«Реал» ўз тарихидаги энг қиммат харидни амалга оширди
|15:06 / 09.08.202616 47812 мин
Мадридликлар 19 ёшли Диоманде учун космик даражадаги сумма сарфламоқда. Бу футболчи ҳақида нималар маълум ва у кутилмаларни оқлайдими?
Фото: Stuart Franklin/Getty ImagesФото: Stuart Franklin/Getty Images
Сўнгги икки мавсум совринсиз қолган «Реал» бу ёзда энг фаол клублардан бири бўлмоқда: Марк Кукуреля, Ибраима Конате, Дензел Думфрис, Бернарду Силва ва энди – Диоманде.
Топ-клублар рақобати
Бу барибир рўй берди: «Реал» 19 ёшли ивуарлик вингер Ян Диоманденинг трансферини эълон қилди. Бу мадридликлар клуби тарихидаги энг қимматбаҳо келишувга айланди. Маълум бўлишича, «Реал» «Лейпциг»га футболчи учун 125 миллион евро тўлайди, яна 15 миллион евро бонуслар сифатида берилиши кўзда тутилган. Шу тариқа, бу Криштиану Роналду, Гарет Бэйл, Эден Азар ва Жуд Беллингҳэмдан ҳам қимматроқ харидга айланди.
Бу ёзда Диоманде учун бир неча топ-клублар кураш олиб борганди. «Лейпциг» охирига қадар нарх борасида ён бермади ва музокаралардан максимум фойда билан чиқди. Жаҳон чемпионатидан олдинроқ ҳам Диоманденинг номи Салоҳ ўрнига янги вингер қидираётган «Ливерпул» билан боғланаётганди. Кейин «Арсенал» ва «Манчестер Сити» каби клублар ҳам унга жиддий қизиқиш билдиришди. Аммо ивуарлик футболчига Англияда ўйнаш варианти маъқул келмади ва у «ПСЖ» таклифини афзал кўрди. Инсайдерлар унинг парижликлар сафига ўтиш жараёни якуний босқичда экани ҳақида хабар беришганди, аммо кутилмаганда пойгага «Реал» ҳам қўшилди ва якунда уни илиб кетди.
Бозор қизиди, «Лейпциг» эса нархни оширишда давом этди. Натижада «ПСЖ» музокараларни тарк этиб, буни оқилона молиявий бошқарув ва таркиб мувозанатини сақлаш тамойиллари билан изоҳлади. Шундан кейин биргина «Реал» қолди ва инсайдер Фабрицио Романо ўзининг машҳур Here we go иборасини қўллади, лекин трансфер кечикди ва фақат бир ҳафтадан кўпроқ вақт ўтиб расмий эълон берилди.
Трансфер нега чўзилди?
Романонинг тасдиғидан расмий эълонгача ўн кун ўтди. AS нашри маълумотига кўра, бунга футболчининг собиқ агентлик фирмаси, Макс Градел (ивуарлик собиқ футболчи) томонидан бошқариладиган Maxidel Management ҳамда унинг ҳозирги вакиллари ҳисобланган Roc Nation ўртасидаги низо сабаб бўлган.
Maxidel компанияси иддао қилишича, Диоманде ўзаро келишувни ноқонуний тарзда бир томонлама бекор қилган. Агентлик ФИФАга шикоят қилиб, футболчининг бошқа фирма олдида мажбуриятлари борлигига қарамай, «Реал» музокараларни Roc Nation билан олиб борганини қайд этган.
Шу билан бирга, бу – трансфер кечикишининг ягона сабаби эмас. «Лейпциг» бошқарувчи директори Марсел Шефер бир неча кун олдин агентлик можароси келишувни барбод қила олмаслиги, клублар эса ҳозирча якуний келишувга эриша олмаганини айтиб чиқди. Афтидан, трансфер расмийлаштирилишини футболчининг вакиллари ўртасидаги баҳс билан бир қаторда «Реал» ва «Лейпциг» ўртасидаги савдолашув ҳам тўхтатиб турган.
Мавзуга оид
Нима бўлганда ҳам якунда келишув амалга ошди ва Диоманде «Реал»нинг трансфер рекордини янгилаб (бунгача Жуд Беллингҳэм 2023 йилда 103 миллион евро ва 20-30 млн атрофида бонуслар), жаҳоннинг энг қимматбаҳо футболчилари сафига кирди. Агар бонуслар тўлиқ тўланадиган бўлса, мадридликлар немисларга жами 140 миллион евро беради, бу эса ивуарлик футболчини энг қимматбаҳо беш футболчидан бирига айлантиради (ундан олдинда фақат Неймар, Мбаппе, Дембеле ва Исак бор).
Sky Germany маълумотига кўра, 15 миллион евролик бонусдан 10 миллиони осон қўлга киритиладиган пуллардир, қолган қисми тўланиши учун эса бироз қатъийроқ шартлар қўйилган. Лекин якуний нарх 135 миллион еврони ташкил этса ҳам, ивуарлик футболчи топ-8 трансфер ичида бўлади.
Футболчининг профили
Фото: Maja Hitij/Getty Images
Диоманде ҳар икки қанотда ҳам хавф туғдира олиши билан ажралиб туради. Унинг асосий оёғи ўнг оёқ, фаолиятини чап қанот вингери сифатида бошлаган ва кўпинча қанотдан марказга кўчиб ўйнаган. Аммо ўтган мавсумда у ўйин вақтининг 61 фоиз қисмини ўнг қанотда ўтказди ва фақат 27 фоиз ҳолатда қарама-қарши қанотда ҳаракатланди.
Шунинг учун ивуарлик футболчи «Реал»да қолган Винисиус билан чап қанот учун рақобат қилишига тўғри келмайди. Диомандени айнан ўнг қанот учун сотиб олишди, Моуринио давридаги асосий схема эса, катта эҳтимол билан, 4-2-3-1 кўринишида бўлади.
Янги футболчи «Реал»га янада кучлироқ бўлишда ёрдам берадими? Бу баҳсли масала. Футболчининг салоҳияти ва истеъдодига шубҳа йўқ. У ёш, кучли ва аъло даражадаги дриблингга эга бўлган, ҳар икки оёқда бирдек ҳаракатланувчи вингер. StatMuse маълумотига кўра, Германия чемпионатининг ўтган мавсумида Диоманде 115 марта муваффақиятли алдаб ўтишни амалга оширган – Бундеслигадаги бошқа бирор футболчи ҳатто 70 талик нуқтага ҳам ета олмаган. Кучли бешлик лигаларида эса ундан юқорироқ натижани фақат Ламин Ямал қайд этган.
Германия чемпионатида Ян 33 ўйинда майдонга тушиб, 12 гол урган ва 9 голга узатма берган. Бу яхши рақамлар, аммо феноменал кўрсаткич эмас. Шу билан бирга, у ўз вазиятларидан фойдаланиш бўйича жуда яхши натижага эришган: xG 7 га тенг бўлган ҳолда 12 та гол урган. Аммо вазиятларнинг бир қисмида унга омад кулиб боққанини ҳам ҳисобга олиш керак, омади келмаганида эса сермаҳсуллик пасайиши мумкин.
Кутилмаган кўтарилиш
«Лейпциг»дан олдинги клуби «Леганес»да Ян атиги 10 та ўйин ўтказган ва унинг профессионал фаолияти ҳозирча фақат тўлиқ бўлмаган бир ярим мавсумдан иборат.
Лекин немис клубига келиши билан у барчада катта таассурот қолдира бошлайди. Ўтган йил ёзида Швейцарияда ўтказилган йиғин у янги мавсумни бошланғич таркибда бошлаши учун етарли бўлади. У «Айнтрахт» билан ўйинда ҳет-трик қайд этади ва Bild нашри томонидан «1» баллга (энг юқори баҳо) лойиқ кўрилади. Мавсум якунига келиб эса уни Бундеслиганинг энг яхши дебютанти сифатида тан олишади.
Ҳолбуки уни ўз вақтида «Челси», «Кристал Пэлас», «Борнмут», «Рейнжерс», «Олимпиакос» ва ҳатто МЛС клублари ўринбосарлари таркибига ҳам қабул қилишмаганди.
Диоманденинг ҳикоя қилишича, Лондонда «Пэлас» базасида ўтган кўрикдан кейин унинг олдига Олисе ва Эберечи Эзе келишган ва «Йигитча, сен чиндан яхши ўйнаркансан» дейишган. Аммо ўшанда инглизлар клубидан таклиф бўлмайди, виза муддати тугайди ва Ян йиғлаганча Африкага қайтади. Умуман, унинг болалиги ўта оғир кечган.
«Биз бошқа болалар билан қишлоққа картошка ўғирлашга борардик, чунки жуда оч эдик. Биз «банкни тунаш»ни ҳам уюштиргандик. Икки бола дўкон эгасини чалғитиб турган, қолган 18 бола эса иккитадан картошка кўтариб қочган. Картошкалар янги ҳам эмасди. Аммо биз учун улар ажойиб таъмга эга эди. Ҳа-ҳа! Бу ҳали ҳам менинг севимли таомим. Сариёғ қўшилган қайнатилган картошка. У менга ўша даврларни эслатади. Биринчи ҳақиқий футбол бутсамни олганимда, уни кийиб ухлаганман. Болалигимда ҳар доим оқ пластик сандалларда ўйнардим. Ҳозир ҳам уйга қайтганимда уларда ўйнайман. Бу анъана».
Бошқалар Диоманденинг келажагига шубҳа билан қараганида синглиси Роксан унга энг кўп ишонч билдирганди. Ян профессионал даражада дебют қилганидан (ла лигада «Реал»га қарши ўйинда) бир неча ҳафта ўтиб у вафот этган. Ўшанда зиёфатда Роксананинг коктейлига нимадир қўшиб қўйилган ва у шундан кейин ҳушини йўқотган. У доим акаси келгусида буюк футболчига айланишини айтиб келарди.
«Мен сен ҳақлигингни исботлайман ёки буни исботлаш учун жонимни фидо қиламан», – дея The Players Tribune учун мактубини якунлаганди Диоманде.
Энди барчаси Моуринионинг қўлида
Унинг истеъдодига энди бошқаларда ҳам шубҳа йўқ, аммо гап фақат бунда эмас. «Реал» ҳужум чизиғида ҳозирча бир-бирига мослаша олмаётган икки суперюлдуз бор ва улар ҳимояланишда деярли қатнашмайди. Айнан шунинг учун олдинги мавсумларда мадридликлар тўпсиз ҳолатда Мбаппе ва Винисиусни олдинда қолдириб, 4-4-2 схемасида ҳаракатланишган. Ҳужумчилар ортида тўрт нафар яримҳимоячи жойлашиб, улар учун ҳам катта ҳажмдаги ишни бажаришган.
Диомандени дангаса деб бўлмайди. Катта эҳтимол билан, тўпсиз ҳолатда у ўнг қанотни ёпиши талаб этилади, у бу қанотда мураббий танловига қараб ёки Трент Александр-Арнолд, ёки Дензел Дюмфрис билан шерик бўлади. Уларнинг иккиси ҳам ҳужумкор қанот ҳимоячилари бўлиб, ҳимояланишдаги сифатлари билан мақтана олишмайди. Федерико Валверде бу зонага ёрдамга келиши мумкин, аммо бу ҳолда у ташлаб келган позицияни кимдир ёпишига тўғри келади. Бу футболчиларнинг барчасини қандай жойлаштириш ва шу билан бирга тузилмани бузмаслик – Моуринио учун катта савол.
Ҳар икки оёғида бирдек ўйнай олиши Диомандега ҳужумда қанот ҳимоячилари билан ўзаро муносабатларда қўл келади. Трент билан бирга тушганида у ўнг қанотда кенгликни таъминлаши мумкин, инглиз ҳимоячиси бу ҳолда вазиятлар яратиш учун марказроққа кўчади. Дюмфрис билан жуфтликда Яннинг ўзи инсайд ролини бажаришга ўтади ва қанотни шеригига қолдиради.
Клубда доим ўнг қанотда футболчилар етарли бўлган, лекин ижрочилар доимо ўзгариб турарди. Амалда, жамоада узоқ вақтдан бери биринчи марта ушбу позицияга ихтисослашган футболчи пайдо бўлмоқда. Бир муддат асли чап қанот вингери ҳисобланган Родриго ўнг қанотда ўйнашга мажбур бўлди. Бу эса ушбу бразилиялик ўз имкониятларини тўлиқ намоён этишига имкон бермади. Қолаверса, у сўнгги вақтларда жароҳатга мойил бўлиб қолди ва ҳозир ҳам хочсимон боғлами узилишидан кейин тиклангани йўқ.
Ўтган ёзда Аргентинадан олиб келинган Мастантуоно эса ишончни оқламади ва бу ёзда «Фиорентина»га ижарага берилди. Валверде бу позицияда ҳам ўйнай олади, аммо бу унинг асосий амплуаси эмаслиги билиниб қолади. Мураббийлар штабида Эндрик варианти ҳам бор эди, лекин у марказий ҳужумчи сифатида ўзини яхшироқ ҳис қилади. Клубнинг ёзги трансферларидан бири Бернарду Силва ҳам бор, лекин ёши ўтгани ва тезлиги пасайгани туфайли унга марказда ўйнаш қулайроқ бўлиб қолган.
Сўнгги йилларда «Реал» ҳужумларида чап қанот асосий йўналиш бўлиб қолганди. Анчелотти даврида эса қасддан шу қанотни футболчилар билан тўлдириш ўзига хос услубга айланганди. Шу билан бирга, бундай ўзига хослик жамоани бир қанотга қарам қилиб қўйган ва позицион ҳужумлар уюштиришга халал берган. Диоманденинг келиши бу камчиликни тузатиши мумкин, аммо конструкцияни бузмасдан ўрната олиш ҳам керак.
«Реал» раҳбарияти Моуриниога у истаган футболчиларнинг деярли барчасини олиб берди. Унинг ихтиёрида кенг таркиб ва хилма-хил имкониятлар ҳосил бўлган. У қўл остидаги юлдузларнинг барчасига майдондан жой топиб бериши ҳам муаммога айланиши мумкин. Катта эҳтимол билан, мавсум давомида мухлислар турли тажрибалар ва схемалар ўзгаришига гувоҳ бўлишади. Кимдир ўйин амалиёти камлигидан норозилик билдириши ҳам мумкин.
Бу каби кенг кўламли трансфер кампанияси ва таркиб тўлдирилишидан кейин мураббийда ҳеч қандай эътироз бўлмаслиги керак. Жозе бу қадар кўп топ даражадаги футболчилар билан исталган моделни қуриши мумкин. У бундай имкониятдан қанчалик тўғри фойдаланишини олдиндаги мавсум кўрсатиб беради.
