Мавсумнинг илк класикоси олдидан: ким қандай ҳолатда?
|19:094 53113 мин
«Реал»га қандай омиллар ёрдам бериши мумкин? Каталонияликларнинг муаммолари қанчалик жиддий?
Фото: Getty imagesФото: Getty images
«Чемпионат» колумнисти Дмитрий Бажанов ҳафтанинг асосий ўйинидаги 5 та муҳим омилни кўриб чиқди.
«ПСЖ»дан учралган мағлубиятга қарамай, «Барселона» ҳамон қўрқинчли рақиб бўлиб қолмоқда. Ла Лигада бу каби томошабоп ўйин кўрсатадиган бошқа жамоа йўқ. Чемпионлар лигасида ҳам барчаси назорат остида. Каталонияликлар «ПСЖ» билан ўйингача дастлабки икки турда «Фейеноорд» ва «Галатасарой» дарвозасига жами тўққиз гол уришганди.
Бу вақтда эса Моуринио ҳали «Реал» ўз ўйинини қуриб олгани йўқ. Жамоа ЕЧЛда ҳозирча йўқотишсиз кетаётган бўлса-да, «Рома»га қарши ўйинда қийин аҳволга тушиб қолганди ва фақат сўнгги дақиқалардаги камбэк эвазига мағлубиятни ғалабага айлантирганди. Ла лигада эса аллақачон «Бетис» ва «Атлетико»дан мағлуб бўлди. Севилядаги ўйинда мадридликлар мағлубиятдан қутулиб қолиши ҳам мумкин эди (Карлос Эспининг суперголи бекор қилинди, Килиан Мбаппе пеналтини уролмади), дербида эса рақибга шунчаки кучи етмади. Антонио Рюдигернинг ўйин охиридаги голи амалда ҳеч нарсани ўзгартирмади.
Энди эса олдинда класико. Агар «Барселона» ғалаба қозонса, «Реал» билан орадаги фарқни тўққиз очкога етказади ва бу жуда кўп. Агар «Реал» ғалабани ўзиники қилса, унда чемпионлик пойгасидаги интрига юзага келади. Шу билан бирга, класико арафасида турнир жадвалида ушбу икки жамоа ўртасида жойлашган «Атлетико» фойдасига хизмат қиладиган дуранг ҳам қайд этилиши мумкин.
Мавсум стартида «Барселона» «Реал»дан кучлироқдек таассурот қолдирмоқда. Қолаверса, бу мавсумдаги дастлабки класикога «Камп Ноу» мезбонлик қилади. Бу ўйинга Ҳанс-Дитер Флик шогирдлари фаворит сифатида бормоқда. Мадридликлар бу ўйинда йирик ҳисобда ютқазишини тахмин қилаётганлар ҳам кам эмас.
Аммо «Реал» фойдасига бўлган бир неча омиллар бор. Бу автоматик равишда «Реал» ютади дегани эмас, ўйинда исталган нарса рўй бериши мумкин. Шунга қарамай, Жозе Моуринио жамоасини яққол аутсайдер сифатида кўриш ва унинг йирик ҳисобдаги мағлубиятини кутиш – камида қисқа ўйлаш ҳисобланади.
Тажриба
«Реал» фойдасига хизмат қиладиган биринчи омил – Жозенинг ўзи. Бу унинг Мадрид клубига қайтгандан кейинги илк класикоси бўлади ва у бундай ўйинларга ташналигига шубҳа йўқ. Моуринионинг тактик услублари эскириб қолгани ва у трендлардан ортда қолгани ҳақида истаганча гапириш мумкин. Бу маълум даражада тўғри фикр. Аммо у ҳамон жамоани алоҳида катта ўйинга тайёрлашни билади. У доим буни яхши уддалаган ва ҳозир ҳам буни эсдан чиқармагани аниқ.
Мавзуга оид
Фото: Denis Doyle/Getty Images
Жозе Моуринио
Ҳа, «Реал» бу мавсумда шундай катта ўйинлардан бирини, «Атлетико»га қарши дербини бой берди. Аммо ўша ўйинни Дин Ҳаусеннинг четлатилиши ва Алехандро Грималдонинг пеналтидан урган голи ҳал қилганди. «Реал» бу иккиталик зарбадан ўзига кела олмади.
Мадридликлар сон жиҳатдан тенглик пайтида ҳам рақибдан кучлироқ эмасди, аммо ўша четлатиш ва дарҳол гол ўтказиш бўлмаганида, ўйин давоми бошқача кечган бўлиши мумкин эди.
Жозе навбатдаги катта ўйин олдидан ўша дерби ҳақида эслатган бўлса ажаб эмас: Ла Лигада битта катта ўйинни бой бериб бўлдик, бу такрорланишига йўл қўйиб бўлмайди. Ҳозирги Моур буюк тактик эмас, аммо жамоани ўз имкониятларини тўлиқ ишга солишга мажбур эта олади. Қолаверса, «Реал» класикога қаторасига тўрт ўйиндаги ғалаба билан келмоқда ва футболчилар қандай кайфиятдалиги муҳим.
«Реал» «Камп Ноу»да ёрқин, инновацион футбол намойиш этиши даргумон. Катта эҳтимол билан, «қаймоқранглилар» чуқур ҳимояланади, рақиб босимига чидайди, тактик фоллар билан «Барса» ўйинини бузишга ҳамда тезкор қарши ҳужумлар уюштиришга ҳаракат қилади. Агар якунда бу иш берадиган бўлса, ҳеч ким Жозени танқид қила олмайди.
Винисиз – яхшироқ!
Трибуналарда тез-тез «No [исталган фамилияни қўйиш мумкин] – no party» ёзувли баннерлар кўтарилади. «Реал»да эса ҳозирда бунинг акси: Винисиус майдонда эмаслигида жамоанинг ўйини очилади. Бразилиялик футболчи класикода қатнашмайди: у «Вилярреал»га қарши ўйинда рақиб футболчиси Натан Салибанинг сочидан тортиб қолгани учун тўрт ўйиндан иборат дисквалификацияни ўтамоқда. Бу эса «Реал» учун плюсдир.
Фото: Angel Martinez/Getty Images
Винисиус Жуниор
Вини мавсум бошидан буён формасини тиклай олмаяпти. Ёзда у «Арсенал»га кетишга яқин эди, «Реал» эса унинг молиявий талабларини бажариб, уни олиб қолди. Аммо у ҳозирча раҳбариятни бу қарори учун афсуслантирмоқда. Унда мавсум бошидан буён атиги битта гол бор. Сўнгги голли ҳаракатини 12 сентябр куни амалга оширган – «Райо Валекано» билан ўйинда ассист муаллифи бўлган. Мураббий уни захирага олганида эса норозилигини намойиш этмоқда – «Рома» ва «Лейпциг»га қарши ўйинларда шундай ҳолат кузатилди. «Реал» унинг шартномасини бундай ўйини учун узайтирмаганди.
Бразилиялик футболчи дисквалификацияга учрагани эса Моуриниога қўл келмоқда ва у юлдузли футболчини асосий таркибга киритишга мажбур бўлмаяпти. Айтиш мумкинки, футболчининг «Вилярреал»га қарши ўйиндаги ўша қилиғи бош мураббийни бир муаммодан халос қилди. У йўқлигида Ян Диоманде бошланғич таркибда тушмоқда ва аста-секин янги жамоасига мослашиб бормоқда.
Вини мавсум стартидаги ўз даражасини намойиш эта олмаётганди, Диоманде эса, ўзи тушган ўйинларда майдондаги энг ёрқин футболчи бўлмоқда ва голли ҳаракатлар амалга оширмоқда. Унинг ўзига бўлган ишончи ортмоқда, клуб унинг трансфери учун тўлаган катта маблағ босимини ҳис қилмаяпти. У ла лиганинг сўнгги ўйинларида 2+1, ЕЧЛда эса 1+2 кўрсаткичини қайд этди.
Энди ивуарлик футболчи ўз скилларини дунёдаги энг асосий ўйинда ҳам намойиш этиши керак. Винисиус эса буни трибунадан томоша қилади.
Ҳимоясиз «Барселона»
«Барселона» ҳимоясида жиддий муаммолар бор. Асосий жамоада соғ ҳолатдаги ҳимоячи деярли қолмаган. Катта эҳтимол билан, «Реал»га қарши ўйинда ҳам «ПСЖ» билан ўйиндаги ҳимоя чизиғи тушади: Пау Кубарси, Ҳави Эспарт, Жоау Канселу ва Жерар Мартин. Унинг устига, Мартин «Бетис»га қарши ўйиндаги шикастланиш билан ўйнашда давом этмоқда. Агар ўрнига бошқа футболчи топилганида, Флик уни бу ҳолатида ўйнатмаган бўларди.
Жюл Кунде класикогача тикланишга улгурмади. Шунингдек, Эрик Гарсия ва Андреас Кристенсен ҳам бу ўйинда бўлмаслиги олдиндан аниқ эди. Флик қийин аҳволда. «Барса»да бундай ҳолатлар олдин ҳам юзага келган ва бу қийинчиликлар мураббийни чўчита олмайди. У бир неча бор шундай паллаларда «Ла Масия»даги ёшларга имкон берган ва улар кейинчалик асосий таркиб футболчиларига айланишган.
Фото: Fran Santiago/Getty Images
Ҳанс-Дитер Флик
Аммо ҳозир олдинда – класико ўйини. Бу тажрибалар ўтказиш учун мос вақт эмас. Ва Фликда тўрт позиция учун тўрт ҳимоячи бор. Шу билан бирга, у ўтган мавсумда фақат қанотда ўйнаган Мартинни марказда туширишга мажбур. 19 ёшли Эспарт учун эса бу фаолиятидаги илк класико бўлади. У асосий жамоадаги илк мавсумидаёқ порламоқда – ўнгда ҳам, чапда ҳам бирдек фаоллик кўрсатмоқда ва анчадан буён асосий таркиб футболчиси бўлгандек кўринмоқда. Аммо Эспарт асосий жамоада эндигина 14 ўйинда майдонга тушган. Унда катта ўйинлар тажрибаси мавжуд эмас.
Алехандро Балденинг тажрибаси Эспартникидан кўпроқ. Аммо унинг бу мавсумдаги ўйин вақти атиги 28 дақиқа. Флик оғир жароҳатдан эндигина тикланган футболчини бирданига майдонга ташлай олмайди. Бундан ташқари, Балде – фақат қанотга ихтисослашган футболчи. У зарурат туғилганда фақат Эспарт ёки Канселуни алмаштира олади. Мартин ёки Кубарси ўйнай олмаса, у нима қилиши номаълум.
Флик бу вазиятдан ҳам чиқиб кетиши мумкин. Аммо, юқорида айтилганидек, унинг ўзи ҳам академия тарбияланувчиларини синаб кўриш учун класико эмас, оддийроқ ўйинни афзал кўрган бўларди.
«Барса» етакчисиз қоладими?
Рафиня мунтазам равишда «Реал» дарвозасига гол уриб келади. У ўз фаолиятидаги 13 та класикода жами етти гол урган. Ушбу бразилиялик ватандоши Винисиусдан фарқли ўлароқ, янги мавсумни ажойиб бошлади: дастлабки саккиз ўйинда рақиблар дарвозаларини 14 бор ишғол этди! Аммо шундан кейин халқаро танаффус юзага келди ва терма жамоа йиғинидан жароҳат билан қайтди.
Рафиня аллақачон майдонга қайтишга улгурди. Флик уни аввалига «Бетис» билан ўйинда 20 дақиқа ўйнатди, «ПСЖ»га қарши ўйинда эса бошланғич таркибга ҳам киритди (60-дақиқада захирага олинди). Париждаги ўйин олдидан «Барселона»нинг ижтимоий тармоқдаги саҳифасида Рафинянинг сурати «Сизнинг қўрқинчли тушингиз шу ерда» ёзуви билан эълон қилинди. Аммо у «ПСЖ» учун ҳеч қандай даҳшат туғдира олмади. Футболчи майдонда деярли кўринмади, ўзида юзага келган ягона имкониятни қўлдан чиқарди ва ҳисоб 1:1 эканида майдонни тарк этди.
Фото: Franco Arland/Getty Images
Рафиня «ПСЖ»га қарши ўйинда
Рафиня «Реал»га қарши ўйинга қандай ҳолатда келиши «Барселона» учун жуда муҳим. Агар у ҳали ҳам формасини тиклай олмаган бўлса, «Барса» ҳужуми бундан жиддий зарар кўради. Бразилиялик вингер яхши спорт формасида эканида майдонда исталган ишни қила оларди: вазиятлардан аъло даражада фойдаланади, шериклари учун вазиятлар яратади ва майдон бўйлаб кўп югуради. Қолаверса, у жамоа сардори ва етакчиси. Албатта, Флик ва «Барселона»нинг барча мухлислари бундай футболчиси класикода максимал тайёр ҳолатда бўлишини истайди.
Аслида вазият қандайлигини фақат ўйин бошланганидан кейин билиш мумкин. Лекин шуниси аниқки, агар Рафиня ҳали энг яхши ҳолатига қайта олмаган бўлса, бу «Реал»нинг ишини сезиларли даражада осонлаштиради.
Мбаппе: буюклик сари йўл
Мбаппе ва Винисиус дилеммасига (ким жамоада асосийроқлиги ҳақидаги саволга) ҳали ечим топилмаган. Ҳимояга ёрдам бермайдиган ва ҳужумда ҳам бир позицияни талашиб қоладиган бу футболчиларнинг бир вақтда майдонда бўлиши ҳам катта ўйинларда кўп панд берган. Бунгача бирорта класикода фақат Мбаппе бошланғичда бўлиб, Вини бўлмаган ҳолат кузатилмаганди. Фақат бир марта бразилиялик вингер стартда тушиб, француз ҳужумчиси захирадан қўшилган ҳолат бўлганди.
Энди эса Мбаппе илк дақиқалардан майдонга тушади, Винисиус эса захирадан ҳам тушмайди. Ўз ўзида ҳужумдаги асосий рол Килианники бўлади. У энди жамоадаги асосий юлдуз мақомини ким биландир бўлишиши ёки бунинг учун ким биландир курашиши шарт бўлмайди. У аввалбошдан – жамоасининг майдондаги биринчи рақамли футболчиси бўади. Ва ўйин учун режа унга қараб тузилади.
«Барса» билан ўйин Мбаппе учун Винисиусни жамоадаги мақом бўйича ортда қолдириш имконияти. Бу мавсумда Килиан шусиз ҳам барча йўналишларда Винидан анча олдинга чиқиб кетган. Француз ҳужумчиси аллақачон 12 та гол уришга улгурди, бразилияликда – биттагина гол.
Аммо Мбаппе класикони ҳам ўзи ҳал қиладиган бўлса, Винисиус йўқлигида натижа кўрсатадиган бўлса, бу уни янада юқори поғонага олиб чиқиши аниқ. Нима бўлганда ҳам «Элче», «Райо Валекано» ёки «Лейпциг» каби рақибларга қарши ўйинларда статистикани яхшилаш бошқа иш, «Барселона»дек рақибга қарши ўйинда ўз даражасини кўрсатиш – буткул бошқа иш. Рақибни олдинга ўтказиб юбормаслик шарт бўлган шароитда эса бундай қаҳрамонликнинг аҳамияти янада ошиб кетади.
Агар шундай бўлиб чиқса, Вини дисквалификацияни ўтаб қайтганида нафақат асосий юлдуз мақоми учун, балки асосий таркибга кириш учун ҳам кураш олиб боришига тўғри келади.
