Россия Харкив ва Одессага, Украина – Белгородга зарба берди

Белгород

Украина дронлари 9 августга ўтар кечаси Белгород шаҳрига ҳужум қилди. Белгород области оператив штаби хабарига кўра, 29 та кўп квартирали уй, учта маъмурий бино, учта ижтимоий ва олтита тижорий объект шикастланган.

Белгород области губернатори вазифасини бажарувчи Александр Шуваев дастлаб ҳужум оқибатида уч киши ҳалок бўлиб, яна 25 киши, жумладан, тўрт ва тўққиз ёшлардаги болалар жароҳатлангани ҳақида хабар берганди. Болалардан бири шифохонага ётқизилган, унинг ҳолати ўртача оғирликда баҳоланган. Кейинроқ оперштаб кўп квартирали уйлардан бирининг харобаларини тозалаш чоғида эркак киши жасади чиққанини хабар қилди. Шунингдек, ўта оғир аҳволда шифохонага олиб борилган бир эркакнинг жони узилган ва жами қурбонлар сони беш нафарга етган.

Вайронгарчилик кўлами бўйича бу сафарги ҳужум 2023 йил 30 декабрдан буён энг жиддийси бўлди. Ўшанда ракета зарбалари оқибатида 25 киши ҳалок бўлиб, 100 дан ортиқ киши яраланган, шунингдек, 30 та кўп квартирали уйлар шикастланганди.

5 август куни губернатор Шуваев Россия президенти Владимир Путин билан учрашувда Украинанинг Россия бўйлаб зарбаларни кучайтиришидан ўз бошқарувидаги регион энг кўп жабр кўраётганини айтганди.

Харкив ва Одесса

Россия қўшини 9 август куни тонгда Харкив бўйлаб зарба йўллади. Маҳаллий расмийлар ракеталардан бири Салтовка районидаги кўп қаватли турар жой биноларидан бирига урилиб, подъездлардан бирининг еттинчидан тўққизинчи қаватигача вайрон бўлганини маълум қилган. Ушбу бинога қўшни жойлашган кўп қаватли уй ҳам зарба остида қолган. Сўнгги маълумотларга кўра, Харкив бўйлаб зарба оқибатида икки киши ҳалок бўлган ва яна 37 киши жароҳатланган.

Бундан ташқари, Россия Одессага ҳам ракета ва дронлар билан ҳужум қилган. Шаҳарнинг икки районида бир неча турар жойлар шикастланган ва қисман вайрон бўлган. Жами 12 киши жароҳат олган.

Зеленский – Россияга «таъсир операцияси» ҳақида

Украина президенти Володимир Зеленский Россияга қарши 40 кунлик «таъсир операцияси» натижаларидан мамнунлигини билдирди ва уни «муваффақиятли» деб атади. Бу ҳақда у Украина телемарафонида маълум қилган.

Зеленскийнинг сўзларига кўра, Россия қўшини Украина логистикаси бўйлаб зарба беришни ошлагач, Украина бунга «жавоб қайтариш»га қарор қилган. «У ерда йўқотишлар жиддий – триллион рубл… Бу украин кучларининг жуда муваффақиятли амалиёти бўлди <.> Шубҳасиз, мен мамнунман. <…> Улар қанча йўқотишганини, катта муаммоларга дуч келишганини биламиз», – деган Зеленский ва амалиётда Украина қуролли кучлари, Махсус амалиётлар кучлари, ҳарбий разведка ҳамда Украина хавфсизлик хизмати иштирок этганини қўшимча қилган.

Зеленский Москвани Украина Россиянинг «заиф жойларидан хабардорлиги» ҳақида огоҳлантирган:

Логистика – фақат украинларнинг эмас, балки барчанинг заиф жойидир. Логистика – бу кундалик ҳаёт, одатлардир. Бизда Россия тажовузи бошланганидан буён нормал ҳаёт, бундай одатлар йўқ. Россиядагилар буни сезмаган. Албатта, Россияда маҳсулот логистика бузилиши туфайли истеъмолчига етиб бормаса, Россиядаги одамлар ҳам буни ҳис қилиши аниқ... Мен Россияга Украина логистикасига зарба беришни давом эттиришни маслаҳат бермаган бўлардим, чунки биз Россия логистикасини ўрганиб чиқдик.

У Россия «электр тармоқлари ва энергетика объектларини ҳимоя қилиш учун Москва атрофида ҳаво ҳужумидан мудофаа тизимларининг учта ҳалқасини ҳосил қилгани»ни таъкидлаган. Унинг фикрича, Москвадагилар Украина Россия ҳужумларига мос равишда жавоб қайтаришини билади.

Зеленский Россияга қарши 40 кунлик «таъсир операцияси» ҳақида июн ойи охирида эълон қилганди. У бу амалиётдан мақсад «тажовузкор давлатни урушни тўхтатишга ундаш» эканни айтганди.

«Таъсир операцияси» даврида Украина Wildberries’нинг камида 20 та обмори, камида 25 та нефтни қайта ишлаш заводлари ва нефт-газ инфратузилмасидаги бошқа объектларга зарба берди, шунингдек, Қора денгиз ва Азов денгизида танкерлар ҳамда юк кемаларига камида 200 марта ҳужум уюштирди. Ўз навбатида, Россия Украинани баллистик ракеталар билан ўққа тутишни кучайтирди. Украина томони маълумотларига кўра, июл ойида 381 та ракета учирилган – бу уруш бошидан буён исталган ойдагидан кўра кўпроқдир.