Android қурилмалари учун мўлжалланган Google Play иловалар дўконидан Ozon компаниясига тегишли бир нечта дастур йўқолди. Бу ҳақда компаниянинг ўзи 14 август куни кечқурун маълум қилди.
Хусусан, Ozon, Ozon Fresh, Ozon Seller, Ozon Job ва Ozon Travel иловалари Google Playʼда мавжуд эмас.
Компания маълумотига кўра, иловалар нима сабабдан олиб ташлангани ҳозирча аниқ эмас. Шу билан бирга, улар Apple App Store ва Huawei AppGallery дўконларида фойдаланувчилар учун ҳали ҳам мавжуд.
Бундан аввал Google Playʼдан Ozon Bank иловаси ҳам олиб ташланган эди. Банк Европа Иттифоқининг санкциялар рўйхатига киритилган.
Россия сервислари иловалар дўконларидан олиб ташланмоқда
Сўнгги бир неча ой давомида Россияга тегишли қатор рақамли сервислар йирик иловалар дўконларидан чиқариб ташланди.
Жумладан, июн ойида Apple ўзининг App Store дўконидан VKʼга тегишли қатор иловаларни олиб ташлаган. Улар орасида «ВКонтакте», «Одноклассники», VK Messenger, VK Видео, VK Музыка, «Дзен» ва Mail.ru каби сервислар бор.
Июль ойида эса VKʼнинг шунга ўхшаш иловалари Google Playʼдан ҳам йўқолган. Бу ҳолат Европа Иттифоқи холдинг билан боғлиқ тузилмаларга нисбатан янги санкциялар жорий этганидан кейин кузатилган.
Европа Иттифоқи чекловларни изоҳлар экан, бошқа омиллар қаторида VKʼнинг Россияда фуқаролик жамияти ва мухолифатга босим ўтказилишидаги ролини ҳам қайд этган.
Шунингдек, Apple App Storeʼдан «Яндекс Пэй» тўлов сервиси ҳам олиб ташланган. Бу қарор «Яндекс Банк»ка нисбатан жорий этилган санкциялар билан изоҳланган.
