Унутилган “обнал” муаммоси, тижорий ижара бўйича ташаббус ва Beeline билан аффилланаётган Perfectum. Ўзбекистонлик тадбиркорлар давлат раҳбари билан мулоқотда қандай фикр ва ташаббусларни илгари сурди?
Президент Шавкат Мирзиёев 18 август куни, тадбиркорлар билан анъанавий мулоқотида ўз нутқини бошлашдан олдин янги даврнинг илк паллаларида: “Иккита иш ўрни яратган тадбиркорни елкамда кўтариб юришга тайёрман” дея берган ваъдасида ҳали ҳам собит эканини айтди:
“Иккита-учта иш ўрни ташкил қилганларни елкамда кўтараман, деганимни ҳозир ҳам унутганим йўқ. Елкамда кўтаришда давом этишга сизларнинг олдиларингда яна бир марта ваъда бериб, кейин маърузамни бошламоқчиман.
Битта нарсани айтишим керак: биласизларми, биз бир-биримизга жуда яқин бўлдик, давлат билан бизнес орасидаги ишончли кўприк мустаҳкам бўляпти. Халққа мана шундай иш жойлари яратганларинг учун сизлардан миннатдорман”.
Чемпион тадбиркорлар китоб ёзади
Давлат раҳбари “чемпион тадбиркорлар” дея эътироф этилган йирик бизнесменларга мурожаат қилиб, ислоҳотлардан аввалги даврда тадбиркорлик муҳити қанақа бўлгани, янги даврда нималар ўзгаргани ва келгусида нималар қилиниши кераклиги ҳақида китоб ёзишни сўради.
“Мана, чемпион тадбиркорлар ўтирибди. Улар ўзларининг 10 йиллик тажрибасини, [аввал] нима бўлгани, нима бўлди ва нима бўлиши кераклиги тўғрисида бир китоб ёзсаларинг, мен сизлардан миннатдор бўламан. Биласизларми бу нима учун керак? Ораларингда ёш тадбиркорлар ўтирибди – бугун биринчи марта 25 минг тадбиркор қатнашяпти, сизларнинг йўлларинг уларга ўрнак бўлади. Сизларга ўхшашга ҳаракат қилади. Чемпион тадбиркорларимиз, сизлар бизнинг фахримиз, қаҳрамонларимиз десак, баландпарвоз гап эмас, тўғри бўлади. Сизлар қанча қийин йўллардан ўтгансизлар. Лекин буларга (янги тадбиркорларга – таҳр.) қанча осон бўляпти, шу осонликни инобатга олиб икки карра кўп натижага эришиш бўйича уларни даъват қилсаларинг, мен сизлардан миннатдор бўламан”.
Perfectum ва VEON битими
Йиғилишда сўз олган яна бир йирик тадбиркор, Perfectum алоқа оператори таъсисчиси Фарҳод Мамажонов VEON халқаро ҳолдинги (Beeline Uzbekistan компаниясининг ҳам эгаси) билан Ўзбекистондаги телекоммуникация лойиҳаси бўйича 200 млн долларлик келишувга эришгани, энди Рақобат қўмитасининг рухсатини кутаётганини айтиб, бу борада давлат раҳбаридан ёрдам сўради.
