УНИАН хабарига кўра, тегишли баёнот Киевда бўлиб ўтаётган «Кўнгиллилар коалицияси» саммити йиғилиши аввалида янграган.
Киевга шахсан ташриф буюрган Бёрнемнинг таъкидлашича, Буюк Британия 2023 йилдаёқ Украинага узоқ масофали қуролларни топширган биринчи давлат бўлган эди.
«Энди Володимир Зеленский Украинанинг ўзи бу имкониятларни ярата олиши учун биздан Storm Shadow технологиясини тақдим этишимизни сўради. Бугун мен ушбу сўровни маъқуллаганимни ҳамда Британия ва Франция саноатига мурожаат қилганимни мамнуният билан тасдиқлайман. Шунингдек, президент Макрон ва унинг ҳамкасбларига энди Украина билан ушбу салоҳиятни ривожлантириш устида иш олиб боришимиз учун миннатдорчилик билдирамиз», – деб таъкидлади Бёрнем.
Бёрнем қайд этганидек, айни пайтда Россиянинг уруш олиб бориш имкониятлари тугаб бораётгани аён бўлмоқда.
«Шу сабабли Путин ҳозир Украина тинч аҳолисига қарши баллистик ракеталарни қўллаб, террор кампанияси орқали ғалаба қозонишга умид қилмоқда. Яқинда болалар шифохонаси ва болалар боғчаси зарбага учраганини кўрдик. Бу ҳеч қачон ғалаба учун асос бўла олмайди ва биз буни бугун аниқ айтишимиз керак», – деди Бёрнем.
Шу боис, Британия бош вазирининг айтишича, Украинанинг эҳтиёжларини қондириш учун «ҳаво ҳужумидан мудофаа воситаларининг ўз захираларини чуқур ишга солиш» йўлида иттифоқчилар, жумладан, «Кўнгиллилар коалицияси»дан ташқаридагилар билан ҳам биргаликда барча чораларни кўриш ва ҳамжиҳатликда ишлаш зарур.
Украина президенти Володимир Зеленский қайд этганидек, Буюк Британия Украина мудофааси ва Европа хавфсизлигини қўллаб-қувватлашда ҳақиқий етакчи бўлиб қолмоқда. У Буюк Британия ва Франция вакилларига миннатдорчилик билдириб, қабул қилинган қарорлар Украина армиясини мустаҳкамлашини таъкидлади.
Шунингдек, Украина президенти мамлакат ҳаво ҳужумидан мудофаа тизимининг «қишки пакети»ни олиши учун саъй-ҳаракатларни кучайтириш лозимлигини айтди: «Бизга Patriot ракеталарининг қишки пакети керак. Бу пакетга эга бўламиз деб умид қиламиз. Қиш ва совуқ ойлар учун бизга камида 300 та Patriot ракетаси зарур».
