Ўзбекистон тиббиёти тарихида илк бор беморга бир вақтнинг ўзида жигар ва буйрак муваффақиятли кўчириб ўтказилди. Бу ҳақда “Севимли” телеканалида хабар берилди.
Миллий тиббиёт марказида ўтказилган мураккаб жарроҳлик амалиёти жигар циррози ва сурункали буйрак етишмовчилигининг терминал босқичидан азият чеккан, тўрт йил давомида гемодиализ олган беморда бажарилди.
Шифокорларнинг таъкидлашича, бундай ҳолатда фақат жигар ёки фақат буйракни кўчириб ўтказиш етарли натижа бермаслиги мумкин. Шу сабабли иккала органни бир вақтнинг ўзида трансплантация қилиш беморнинг ҳаётини сақлаб қолиш имконини берадиган ягона ечим сифатида кўрилди.
