ANSA агентлиги маълумотига кўра, акцияларни ташкил қилган USB касаба уюшмаси намойишларда 1–1,5 миллион киши қатнашганини билдирган. Италия Ички ишлар вазирлиги эса иштирокчилар сонини 255 минг киши деб баҳолаган.
Намойишчилар, жумладан, уй-жой ижараси ва ёнилғи нархлари кўтарилишидан норозилик билдирган. Акцияларда «Бизга кўпроқ уй-жой керак, кўпроқ бомба эмас» деган шиор ҳам янграган.
Намойишлар аксарият шаҳарларда тинч ўтган. Бироқ Рим ва Туринда кечга бориб айрим иштирокчилар чиқинди қутиларини ёқиб, полициячиларга турли буюмларни улоқтирган. Бунга жавобан полиция кўздан ёш оқизувчи газ ва сув пуркагичлар қўллаган.
Ички ишлар вазири Маттео Пьянтедози айрим шахсларнинг тартибсизлик келтириб чиқаришга уринишларига қарамай, фуқароларнинг тинч намойиш ўтказиш ҳуқуқи таъминланганини билдирган.
DW хабарига кўра, Италиядаги акциялар сўнгги ҳафталарда Франция ва Белгияда ҳам кузатилган норозилик намойишлари тўлқинининг бир қисми бўлган.
31 октябр куни Германиянинг 30 дан ортиқ шаҳрида ҳам шундай акциялар ўтказилиши кутилмоқда. Gen-Z regelt ҳаракати чақируви билан намойишга чиқадиганлар яшаш харажатлари ошиши ва мажбурий ҳарбий хизматни қайтариш эҳтимолига қарши фикр билдириши, таълимга ажратиладиган маблағларни кўпайтиришни талаб қилиши кутилмоқда.
