31 август куни Нью-Йоркда бир аёл сумкасидан иккита катта ошхона пичоғини олиб, ҳеч қандай кўзга кўринарли сабабсиз ўткинчиларга ҳужум қилди. Нью-Йорк полицияси комиссари Жессика Тиш сўзларига кўра, иккала ҳужум ҳам тахминан 20 сония ичида содир бўлган.
Сиснерос аввалига Род-Айленддан келган 68 ёшли сайёҳнинг қорнига пичоқ урган. Эркак метродан чиқиб, хотини билан йўлнинг нариги томонига ўтиш учун турган эди. Шундан сўнг аёл дарҳол Эрин Пиачентининг қорнига пичоқ санчди. Ню-Жерси штатининг Честер шаҳрида яшаган 32 ёшли аёл шифохонада вафот этди. Эркак шифохонага ётқизилган, унинг аҳволи барқарор.
Пиаченти Нью-Йоркдаги Bank of America офисида Бизнесни танлаш ва можаролар (Business Selection and Conflicts) йўналиши бўйича вице-президент бўлиб ишлаган.
Полициячилар ҳужумчини қуршаб олиб, тахминан тўрт дақиқа давомида пичоқларни ташлашни талаб қилишди. Тишнинг айтишича, Сиснерос: «Мен ҳеч нарсани ташламайман. Яхшиси, иккалангизни ҳам ўлдираман», деб жавоб берган ва «Мен сизларни ўлдираман», деб такрорлайверган. Электрошокерлар ишламаган. Аёл полициячиларга пичоқ билан ташланганида, икки офицер ўт очган. Сиснерос ҳам ўша шифохонада жон берган.
Полиция ҳужумни тасодифий ва сабабсиз деб таърифламоқда. Ҳужумчи ва қурбонлар ўртасида ҳеч қандай алоқа йўқ. Тишнинг сўзларига кўра, теракт аломатлари ҳам мавжуд эмас. Ҳужум сабаби ҳозирча аниқланмаган.
Сиснерос ҳақида қуйидагилар маълум: у Квинсда яшаган, Нью-Йорк полиция департаменти (NYPD) маълумотлар базасида судлангани қайд этилмаган. Шу билан бирга, полицияда унинг руҳий ҳолати билан боғлиқ 2018 ва 2019 йилларга оид мурожаатлар қайд этилган. Бу ҳолатлар бўйича қўйилган ташхис ва тафсилотлар расман ошкор қилинмади.
