31 август куни Лионел Месси Аргентина миллий жамоасидаги фаолиятини якунлаганини эълон қилди. Таниқли бомбардир ўз фаолиятидаги улкан муваффақиятлардан ташқари, экзотик машиналарга бўлган иштиёқи билан ҳам машҳур. У ҳақиқатан ҳам ноёб автомобиллар коллекциясига эга бўлиб, уларнинг баъзилари катта бойликка тенг.
Maserati GranTurismo MC Stradale
Аргентиналикнинг севимли автомобилларидан бири Maserati GranTurismo MC Stradale спорткари эди. Итальян купеси 4,7 литрли V8 атмосфера двигатели билан жиҳозланган бўлиб, у суперкарга 4,5 секундда 100 км/соат тезликка эришиш ва соатига 300 км дан юқори максимал тезликда ҳаракатланиш имконини беради. 2017 йилда Месси спорткарда қарийб 50 минг км масофа босиб ўтгач, уни 120 минг еврога сотувга қўйди.
Ferrari F430 Spider
Аммо Месси бошқа бир итальян спорткаридан айрилишни истамади — Ferrari F430 Spider родстери ҳамон футболчининг гаражида турибди. Автомобил Pininfarina ательеси мутахассислари иштирокида, 2000 йилларнинг ўрталарида «Формула-1» болидларида қўлланилган аэродинамика технологияларидан фойдаланиб ишлаб чиқилган. 510 от кучига эга двигателли автомобил 100 км/соат тезликка 3,7 секундда эришади, унинг максимал тезлиги эса соатига 315 кмни ташкил этади.
Pagani Zonda Cinque Roadster
Pagani Zonda Cinque Roadster — Лионел Месси коллекциясидаги энг ноёб, қиммат ва экстремал автомобиллардан биридир. Конструкциясида композит материаллар, титан, магний ва инконел қўлланилган автомобилнинг вазни атиги 1210 килограммни ташкил этади. Улкан 7,3 литрли, 678 от кучига эга AMG В12 двигатели родстерни 100 км/соат тезликка 3,4 секундда олиб чиқади. Машинанинг максимал тезлиги соатига 350 км. Бундай суперкарлардан жами 5 дона ишлаб чиқарилган бўлиб, ҳар бирининг нархи 1,8 миллион евродан бошланади.
