Эстония мудофаа вазири Ханно Певкур 2 сентябр куни кечқурун истеъфога чиқишини эълон қилди. У ўз қарорини мамлакат мудофаа соҳаси учун «сиёсий жавобгарлик»ни зиммасига олиши билан изоҳлади.
Можаро Украина учун қурол-яроғ харид қилиш жараёни билан боғлиқ.
Эстония Давлат мудофаа инвестициялари маркази (RKIK) Украина учун қурол-яроғ етказиб бериш мақсадида Италиянинг Datasel S.R.L. компаниясига 70 млн евро миқдорида аванс тўлаган.
Бироқ Eesti Ekspress нашри суриштирувига кўра, компания ортида ҳиндистонлик тадбиркорлар турган ва у бунга қадар бирорта ҳам артиллерия снаряди сотмаган.
Певкурнинг таъкидлашича, қурол-яроғ хариди бўйича шартномаларни тайёрлаш ва ҳамкор компанияларни танлаш билан бевосита мудофаа вазири эмас, RKIK шуғулланади.
«Мудофаа вазири шартномалар бўйича музокара олиб бормайди, пайпоқ ва патронларни санамайди. Мудофаа вазири Украинага ёрдам бериш бўйича принципиал қарор қабул қилади. Шартномалар бўйича музокараларга тайёргарлик кўриш ва контрагентларни излаш RKIKʼнинг вазифаси», — деган Певкур ERR телерадиокомпаниясига берган интервюсида.
Шунга қарамай, у вазир сифатида бутун мудофаа соҳаси учун жавобгар эканини тан олган.
Певкур сиёсий жавобгарликни ўз зиммасига олишга тайёрлигини билдириб, энди бош вазир янги мудофаа вазирини топиши кераклигини айтган.
Ханно Певкур 2022 йилдан бери Эстония мудофаа вазири лавозимида ишлаб келаётган эди.
Манбага кўра, унинг истеъфосини мамлакат парламенти — Рийгикогу маъқуллаши керак.
Парламентнинг кузги сессияси 14 сентябр куни бошланади. Шу вақтга қадар Певкур Эстония мудофаа вазири вазифасини бажаришда давом этади.
Можаронинг асосий қисми Украина учун ўқ-дори харид қилиш мақсадида Datasel S.R.L. компаниясига 70 млн евро аванс ўтказилиши билан боғлиқ.
Eesti Ekspress суриштирувида компания аввал снаряд сотиш билан шуғулланмагани таъкидланган.
Шу ҳолат Украина учун мудофаа маҳсулотларини харид қилиш жараёнида контрагентларни қандай текшириш ва танлаш масалалари юзасидан саволлар келтириб чиқарган.
Певкур эса бундай шартномалар бўйича музокаралар, тайёргарлик ишлари ва етказиб берувчиларни танлаш RKIK ваколатига киришини таъкидламоқда.
