Непалда ГЭС туннелидан тирик ишчилар топилмоқда

«Тришули 3А» туннелидан биринчи бўлиб олиб чиқилган механик-бригадир Санжай Шоҳнинг айтишича, сув тошқини пайтида диспетчерлик туннелида у билан яна 40-45 киши бўлган. Авария ҳақида хабар берилганида у туннел бўйлаб югурган ва бошқаларни ҳам огоҳлантириб, уларни ҳам қочишга чақирган. Шу туфайли Санжай вақт йўқотган ва ўзи туннел ичкарисида қолиб кетган. Бир неча кун мобайнида у қамалиб қолган бошқа одамларнинг овозларини эшитиб турган ва улар билан алоқада бўлиб турган.

ГЭС туннелларининг кириш жойлари тош ва лой билан тўсилиб қолган. Қутқарувчилар «Тришули 3А» туннелига қадар етиб бориши учун қарийб олти кун керак бўлди. Непал полицияси маълумотига кўра, текшириб чиқилган туннелларнинг деярли барчаси (иккитасидан ташқари) турли жисмлар билан тўлиб қолган.

Қутқарувчилар туннелнинг кириш мумкин бўлган қисми ҳамда машина залини текшириб кўришган, бироқ бошқа овозлар эшитилмаган ва фақат бир кишининг жасадини топишган. Непал армияси вакиллари ГЭС ҳудудида қидирув-қутқарув операцияси давом этаётганини маълум қилган.

Фожиадан ўн кун ўтганида яна икки киши тирик ҳолда топилди. Улардан бири, Хитой фуқароси бўлган ишчини непаллик ва жанубий кореялик қутқарувчилар туннел ичкарисида, кириш жойидан 255 метр масофада аниқлашган.

Шунингдек, ўз вайрон бўлган уйида 10 кун давомида қолиб кетган яна бир аёл ҳам қутқарувчилар томонидан олиб чиқилган. Шу тариқа, сўнгги кунларда қутқариб олинган кишилар сони 4 нафарни ташкил этмоқда. 

«Расвуагади» ГЭСида ҳам қутқарув операцияси давом этмоқда. Непал расмийларига кўра, станциянинг ер ости биносида қамалиб қолган 40 дан ортиқ ишчи ҳали ҳам тирик.