Тўлиқ очилган ҳолатда Mate XT2 ўлчами жиҳатидан планшетга яқинлашади — унинг диагонали 10,2 дюймни (25 см дан ортиқ) ташкил этади. Шунингдек, компания янги смартфонда ўзининг илғор Kirin 9050 Pro чипидан фойдаланилганини қайд этди.
Mate XT2 нархи 20 минг юандан (деярли 3 минг доллар) бошланади, энг қиммат версиясининг баҳоси эса 25 минг юанга (3,73 минг доллар) етади. Смартфон сотуви 12 сентябрдан бошланади.
Шу пайтгача уч букланадиган смартфонни фақат Жанубий Кореянинг Samsung компанияси ишлаб чиқарган эди. Компания уни 2025 йил декабрида тақдим этган, бироқ кўп ўтмай сотувларни тўхтатганди. Айни пайтда Samsung букланадиган смартфонлар бозорида етакчилик қилмоқда. Counterpoint тадқиқот компаниясининг ҳисоб-китобларига кўра, 2025 йилда унинг бозор улуши 40 фоизни, иккинчи ўриндаги Huawei’ники эса 30 фоизни ташкил қилган.
Сўнгги пайтларда премиум тоифадаги буклама телефонларга талаб ортиб бормоқда. Omdia компанияси прогнозига кўра, 2028 йилга бориб уларнинг сотуви 2025 йилга нисбатан икки бараварга ошади ва 36 миллион донага етади.
7 сентябр куни Хитойнинг яна бир компанияси — Xiaomi ҳам ўзининг янги флагман буклама смартфонини тақдим этиши кутилмоқда. Шунингдек, 9 сентябр куни бўлиб ўтадиган тақдимотда Apple ҳам ўзининг буклама смартфонини намойиш этиши тахмин қилинмоқда.
