DW хабарига кўра, Ирландиянинг Европа ишлари бўйича вазири Томас Бирн бу ҳақда 12 октябр куни X ижтимоий тармоғида маълум қилган.

У ЕИ давлатлари Украина ва Молдова учун иккинчи ва учинчи кластерларни очиш, Албания билан музокараларда 17-, 18- ва 19-бобларни, Черногория билан эса 20-бобни якунлаш бўйича келишувга эришганини билдирган.

Украина учун янги кластерларни очишга Венгрия розилигини олишда таълим тўғрисидаги қонунга киритилган ўзгартишлар муҳим аҳамият касб этган.

12 октябр куни Украина Олий Радаси миллий озчиликлар ҳуқуқларига тааллуқли ушбу ўзгартишларни икки ўқишда ва яхлит ҳолда маъқуллаган. Кечқурун депутат Ярослав Железняк қонунни президент Володимир Зеленский имзолаганини маълум қилган.

ЕИга қўшилиш музокаралари олтита йирик тематик гуруҳ — кластерга бўлинган. Улар қонунчилик ва давлат сиёсатининг турли соҳаларини қамраб олади. Музокаралар давомида номзод мамлакатнинг ЕИ қоидалари ва стандартларини қўллашга тайёрлиги баҳоланади.

Кластерлар «Асослар», «Ички бозор», «Рақобатбардошлик ва инклюзив ўсиш», «Яшил кун тартиби ва барқарор ўзаро боғлиқлик», «Ресурслар, қишлоқ хўжалиги ва ҳамжиҳатлик» ҳамда «Ташқи муносабатлар» деб номланади.

Украина учун биринчи — «Асослар» кластери 15 июн куни очилган эди. Янги кластерларни очиш аъзоликка қабул қилишнинг ўзи эмас, балки тегишли соҳалар бўйича музокараларни бошлаш босқичидир.

Аввалроқ, 5 октябрда ЕИнинг кенгайиш масалалари бўйича комиссари Марта Кос Украина ва Молдова учун икки кластерни 13 октябр куни Люксембургдаги ҳукуматлараро конференцияда очиш мумкинлигини айтган. Конференция ЕИнинг Умумий ишлар бўйича кенгаши йиғилиши доирасида ўтказилиши белгиланган.

Коснинг таъкидлашича, Украина ва Молдова жуда мураккаб шароитда тизимли ислоҳотлар ўтказмоқда. Шунга қарамай, улар ЕИга қўшилиш музокараларида етакчилик қилаётган тўрт мамлакат қаторига киради.

Еврокомиссия номзод давлатлардаги ислоҳотларнинг барча йўналишлари бўйича батафсил баҳосини 28 октябрда, кенгайишга оид йиллик ҳисоботида эълон қилиши кутилмоқда.

Марта Кос Украина бир вақтнинг ўзида ўз мавжудлигини сақлаб қолиш учун курашаётгани ва ЕИга қўшилиш жараёнида иштирок этаётганини таъкидлаган. Унинг айтишича, Киев бюджет ва армия эҳтиёжлари учун қўшимча маблағ олиш мақсадида ҳам ислоҳотларни давом эттириши керак.