«Биз энергия сулҳига тайёрмиз, лекин бу Украина учун нимани англатишини тушунишимиз керак. Путин учун энергетика — бу нефт ва газ сотишдир. Биз учун энергетика — бу халқимиз учун электр ва газдир» — деди Зеленский CBS News телеканалига берган интервюсида.
Унинг сўзларига кўра, Киевдаги музокараларда АҚШ президентининг махсус вакиллари Стив Уиткофф ва Жаред Кушнер энергетика объектларига зарба беришни тўхтатиш масаласини кўтарган. Хусусан, улар Россиядаги нефтни қайта ишлаш заводларига (НҚИЗ) зарба бермасликни таклиф қилган.
Зеленский, шунингдек, бундан ташқари, дон экспорти блокадаси масаласини ҳал қилиш зарурлигини таъкидлади, чунки Украина тахминан 30 миллион тонна, Россия эса 70 миллион тонна қишлоқ хўжалиги маҳсулотларини сотиши керак.
«Ҳатто уруш пайтида ҳам вазиятни юмшатиш учун маълум имкониятларни топиш мумкин. Агар сиз музокаралар олиб бораётган бўлсангиз, бу урушни тугатиш учун яхши ният ёки сиёсий иродани намойиш этаётганингизни англатади» — деб таъкидлади Зеленский.
Аввалроқ АҚШ президенти Доналд Трамп Украина ва Россия бир-бирининг энергетика объектларига зарба бермасликка келишиб олганини маълум қилган эди. Унинг таъкидлашича, Россия нефтни қайта ишлаш заводларига қилинган ҳужумлар жаҳон бозорида дизел ёқилғиси ва бошқа нефт маҳсулотлари танқислигига олиб келган.
Кремл энергетика сулҳини «яхши ғоя» деб атади, бироқ НҚИЗ хавфсиз ишлашини таъминлаш ва нефт маҳсулотлари ишлаб чиқариш ҳажмини ошириш тақчилликни бартараф этишга ёрдам бермаслигини таъкидлади.
«Асосий муаммо нефт маҳсулотларини жаҳон бозорларига олиб чиқиш билан боғлиқ» — деди Россия президенти матбуот котиби Дмитрий Песков. Унинг аниқлик киритишича, гап Украинанинг танкерларга берган зарбалари ва халқаро санкциялар ҳақида бормоқда.
