АҚШ Конгрессининг Вакиллар палатаси аввалроқ Сенатдан ўтган Россияга қарши «дўзах санкциялари» тўғрисидаги қонун лойиҳасини маъқуллади. Энди ҳужжат имзолаш учун президент Доналд Трампга юборилади.
Reuters хабарига кўра, қонун лойиҳасини 262 нафар конгрессмен ёқлаб, 159 нафари қарши овоз берган. Уни деярли барча республикачилар ва 58 нафар демократ қўллаб-қувватлади.
«Линдси Грэмнинг Россия ва Эронга қарши 2026 йилги санкциялар тўғрисидаги акти» деб номланган қонун лойиҳаси Россиянинг энергетика ва мудофаа соҳаларига, шунингдек, амалдаги санкцияларни четлаб ўтиш учун ишлатиладиган танкерларнинг «махфий флоти»га қарши янги чекловларни назарда тутади.
Бундан ташқари, ҳужжат Трампга Хитой, Ҳиндистон ва бошқа мамлакатлар томонидан Россия нефти ва газини харид қилиш ҳажмини камайтириш учун уларга нисбатан 100 фоизгача божлар жорий этиш ҳуқуқини беради. Қонун лойиҳасига Эронга қарши санкцияларни кенгайтириш ҳам киритилган. Ташаббус норасмий равишда «аёвсиз санкциялар» тўғрисидаги қонун лойиҳаси деб аталмоқда.
Сенат қонун лойиҳасини август ойида маъқуллаган эди. Овоз беришдан олдин Украина президенти Володимир Зеленский америкалик қонунчилар билан учрашиб, уларни ҳужжатни қўллаб-қувватлашга чақирди ва процессуал овоз беришлардан бирини бевосита Сенат залидан кузатди. Reuters ҳисоб-китобларига кўра, қонун лойиҳаси Трампнинг Оқ уйга қайтиши ва 2025 йил январ ойида ҳар икки палата республикачилар назоратига ўтганидан кейин Конгресс томонидан қабул қилинган Украина билан боғлиқ энг муҳим ҳужжат бўлди.
Ҳужжатни кўриб чиқиш бир йилдан ортиқ давом этди. Линдси Грэм ва бир неча ўнлаб сенаторлар уни 2025 йил апрел ойида киритган эди, бироқ Конгресснинг республикачи раҳбарияти овоз беришни ўтказиш учун Трампнинг розилигини фақат 2026 йил июл ойида, Грэм ўлимидан бир неча кун олдин олди. Шундан сўнг қонун лойиҳасига унинг номи берилди.
Вакиллар палатасидаги демократларнинг катта қисми ҳужжатга қарши чиқди. Уларнинг фикрича, қонун лойиҳаси Трампга божлар жорий этиш, жумладан, АҚШ иттифоқчиларига қарши божлар киритиш учун жуда кенг ваколатлар беради, шу билан бирга, агар президент санкцияларни мамлакат миллий манфаатларига зид деб ҳисобласа, уларни қўлламаслик имконини беради. Вакиллар палатасидаги демократлар етакчиси Ҳаким Жеффриснинг айтишича, ушбу истиснолар туфайли Россияга зарар етказиши мумкин бўлган янги санкциялар жорий этилмай қолиши мумкин.
