Naked Science нашрининг ёзишича, Россия Бош давлат экспертизаси лойиҳа ҳужжатларини маъқуллагани ҳақидаги маълумот капитал қурилиш объектлари лойиҳа ҳужжатлари экспертизаси хулосаларининг ягона давлат реестрига киритилган.
Бино Санкт-Петербургнинг Приморский туманидаги Лахта-Олгино муниципал округида жойлашади. Лойиҳанинг қурувчиси — «Синергия» акциядорлик жамияти, техник буюртмачиси эса «Ренконс» акциядорлик жамияти ҳисобланади.
Нашрга кўра, қурилиш якунланганидан сўнг минора дунёнинг энг баланд ўнта биноси қаторига кириши кутилмоқда.
Бино қандай кўринишда бўлади?
Меъморий концепцияга мувофиқ, бино ҳажмини марказий, бир нечта қават баландлигини қамраб олувчи атриумлар атрофида буралиб кўтариладиган иккита спиралсимон шакл ҳосил қилади.
Миноранинг 43, 70 ва 88-қаватларида қишки боғлар кўринишидаги холлар ташкил этилади. Уларда кафетерийлар ва кўкаламзорлаштирилган ҳудудлар бўлиши кўзда тутилган.
Биринчи ва 100-қаватларда ноозиқ-овқат товарлари дўконлари, дорихона киоски ва сувенир савдоси ҳудудларини жойлаштириш режалаштирилмоқда. Бинонинг юқори қисмини кўргазма майдони ва шаҳар манзарасини томоша қилиш майдончаси эгаллайди.
«Лахта Центр — 3» Санкт-Петербургда шаклланаётган баланд бинолар мажмуасининг бир қисми бўлади. Август бошида Россия Бош давлат экспертизаси «Лахта Центр — 2» осмонўпар биносининг лойиҳа ҳужжатларига ҳам ижобий хулоса берган эди.
Шунингдек, Санкт-Петербургнинг ердан фойдаланиш ва қурилиш комиссияси баланд биноларни жойлаштириш учун мўлжалланган ер участкаларининг янги таснифини маъқуллаган.
