Бу ҳақда 28 сентябр, душанба куни эрталаб Харкив вилояти ҳарбий маъмурияти раҳбари Олег Синегубов ва шаҳар мэри Игор Терехов ўз Telegram-каналларида маълум қилди.
Тереховнинг сўзларига кўра, шаҳарнинг шимоли-шарқий қисмидаги Киев ва Салтов туманларига бошқариладиган авиабомбалар билан зарба берилган. Оқибатда бир нечта кўп қаватли уйга шикаст етган.
Мэр вазият маркази маълумотларига таяниб, Салтов туманида авиабомба бевосита кўп квартирали турар жойга тушганини билдирган.
«Зарба кўп квартирали уйнинг иккинчи қаватига тўғри келган. Турар жойнинг иккинчи ва учинчи қаватлари вайрон бўлгани қайд этилди», — дея аниқлик киритган Синегубов.
Киев ва унинг атрофидаги ҳужумларда уч киши ҳалок бўлди
Россия армияси бундан олдинги тунда ҳам Украинага ҳужум қилган. Киевда Россия дронлари ҳужуми оқибатида бир эркак ҳалок бўлган.
Украина Фавқулодда вазиятлар давлат хизмати маълумотига кўра, қутқарувчилар унинг жасадини шаҳарнинг Соломенск туманидаги нотурар бино ёнғинини ўчириш вақтида топган. Бинода дрон зарбасидан кейин ёнғин чиққан.
Бундан ташқари, 27 сентябр оқшомида Киев яқинидаги Софиевская Боршчаговка қишлоғида бозорга дрон келиб тушиши оқибатида икки киши ҳалок бўлган, яна тўрт киши яраланган. Бу дастлабки маълумотларни Украина пойтахти мэри Виталий Кличко эълон қилган.
Украина президенти Володимир Зеленскийнинг билдиришича, ўша куни Киевнинг бир нечта туманида дрон зарбалари қайд этилган, ўнлаб киши жабрланган.
«Кечадан буён россияликлар турли русумдаги жами 277 та зарба берувчи дронни қўллади. Уларнинг 155 таси реактив дронлар», — деган Зеленский.
