Naked Science нашри ёритган Visual Capitalist инфографикасида мамлакатларнинг 2025 йилдаги дизел экспорти кўрсаткичлари таққосланган. Маълумотлар Joint Organisations Data Initiative — JODI ва Нефть экспорт қилувчи мамлакатлар ташкилоти — ОПЕКнинг ойлик статистикаси асосида йиллик ўртача қийматлар сифатида ҳисобланган.
АҚШдан кейинги ўринда турган Россия кунига ўртача 783,4 минг баррел, Саудия Арабистони эса 678,2 минг баррел дизел экспорт қилган.
Биринчи бешталикка Ҳиндистон ва Жанубий Корея ҳам кирган. Уларнинг ҳар бири суткасига 500 минг баррелдан ортиқ дизел ёнилғисини ташқи бозорларга етказиб берган.
АҚШнинг етакчилиги йирик қайта ишлаш қувватлари билан боғлиқ
Материалда АҚШнинг экспортдаги устунлиги, асосан, мамлакат нефтни қайта ишлаш саноатининг кўлами билан изоҳланган.
2026 йил январ ҳолатига кўра, АҚШда 130 та фаол нефтни қайта ишлаш заводи мавжуд бўлган. Уларнинг нефтни бирламчи қайта ишлаш бўйича умумий қуввати суткасига 18,2 миллион баррелни ташкил этган.
Айрим мамлакатлар экспортида қайта экспортнинг улуши катта
Нидерландия, Сингапур ва Белгия биргаликда жаҳон дизел экспортининг 12,9 фоизини таъминлаган. Бироқ бу ҳажмнинг сезиларли қисми қайта экспорт ҳиссасига тўғри келади.
Ушбу мамлакатлар йирик савдо марказлари сифатида дизел ёнилғисини импорт қилади, сақлайди, турли партияларни аралаштиради ва кейин бошқа бозорларга жўнатади. Шу сабабли уларнинг экспорт кўрсаткичлари фақат ўз заводларида ишлаб чиқарилган ёнилғи ҳажмини англатмайди.
Европа экспортда биринчи, аммо импортга ҳам эҳтиёж катта
Минтақалар кесимида Европа жаҳон дизел экспортининг 35,3 фоизи билан биринчи ўринни эгаллаган. Европанинг ушбу экспорт ҳажмида Россия улуши чоракдан кўпроқни ташкил этган.
Европа экспортининг катта қисми минтақа ичидаги савдодан иборат. Жумладан, Германия, Италия ва Испаниядаги нефтни қайта ишлаш корхоналари қўшни мамлакатларга ёнилғи етказиб беради.
