АҚШ президенти Доналд Трамп ва Россия президенти Владимир Путин ўртасидаги дизел импорти бўйича келишув доирасида Россия ёнилғисини АҚШга олиб кетаётган уч танкердан иккитаси йўналишини ўзгартирди, деб хабар берди Financial Times.
Россия ёнилғиси билан АҚШга йўл олган учта нефт танкеридан иккитаси йўналишини ўзгартириб, Оқ уй раҳбари Доналд Трамп ва Россия президенти Владимир Путин ўртасида аввалроқ тузилган Россия дизел ёнилғисини сотиб олиш ва импорт қилиш бўйича келишувни хавф остига қўйди. Бу ҳақда Financial Times нашри 4 ноябр, чоршанба куни хабар берди.
FT маълумотларига кўра, Россиянинг Talisman танкери ҳамда Ҳонгконг компаниясига тегишли, Сьерра-Леоне байроғи остида сузаётган Leruo танкери энди АҚШнинг Атлантика соҳилини бориш манзили сифатида кўрсатмаяпти. Leruo 2 ноябрдан Бразилия томон йўналиш олган. Talisman эса Ўрта Ер денгизига чиқиб, ҳозир Жазоир соҳиллари яқинида турибди ва for orders — «кўрсатмалар кутилмоқда» деган сигнални узатмоқда. Бу юкнинг ҳозирча тасдиқланган харидори ёки етказиб бериладиган порти йўқлигини англатади. Financial Times қайд этишича, ҳар икки танкер Европа Иттифоқи санкциялари остида.
Бир нечта танкер АҚШ томон ҳаракатни давом эттирмоқда
Грециянинг Eastern Mediterranean Maritime кемачилик компаниясига тегишли учинчи танкер — Agioi Fanendes АҚШ томон ҳаракатланишда давом этмоқда, бироқ у ҳам «кўрсатмалар кутилмоқда» деган сигнални узатяпти.
«Танкер шу ҳафта охирида Ню-Йоркка етиб бориши керак. Бироқ америкалик харидорлар тартибга солиш талаблари, қонунчилик ва санкциялар билан боғлиқ хатарлар туфайли очиқ-ойдин эҳтиёткорлик қилаётганини ҳисобга олсак, бу танкер ҳам АҚШ портларига киришдан воз кечиб, йўналишини ўзгартирса, ажабланарли бўлмайди», — дея Kpler компанияси таҳлилчиси Мэтт Смитнинг сўзларини келтиради FT.
Айни пайтда Сейшел оролларидаги компанияларга тегишли, санкциялар остидаги Beast танкери 27 октябрда Россиянинг Приморск портида юк ортган ва АҚШнинг Атлантика соҳили томон ҳаракатланишда давом этмоқда, деб ёзади FT.
АҚШдаги ёнилғи вазияти
Эрондаги уруш бошланганидан буён дизел ёнилғиси фючерслари нархи 60 фоиздан кўпроқ ошди. 2026 йил ноябр ойи бошида АҚШдаги ёнилғи қуйиш шохобчаларида дизелнинг ўртача нархи бир галлон учун қарийб 6,30 долларни, яъни бир литр учун 1,66 долларни ташкил этди.
