Кремлга кўра, Путин ва Трампнинг телефон қўнғироғи Украина уруши бўйича тинчлик музокараларининг боришига умуман таъсир қилмайди. Яъни Москва наздида бу қўнғироқнинг уруш учун деярли аҳамияти йўқ.
Reuters'нинг ёзишича, Путин Трамп билан мулоқотда Украинанинг ўтган Россиядаги парламент сайлови вақти Москвага учирган дронлари сабаб музокараларни қайта бошлаш имконияти барбод қилинганини гапирган.
Трамп сайланганидан бери уруш борасида Вашингтоннинг ҳаракатлари натижасиз қолиб келмоқда.
Телефон мулоқотидан бир кун аввал эса давлат котиби Рубио Россиянинг Украинадаги уруши дахшатли вазиятга тушиб қолганини, АҚШ эса уни тугатиш пайида эканини таъкидлаган.
Путин ўтган ой парламент сайловларидан кейин Украина билан музокараларни қайта бошлашга рози эканини айтган эди, бироқ Киевнинг ҳужуми уни фикридан қайтарган. Ёхуд унинг ўзи шундай деб масалани чўзмоқда.
«Киев асосий овоз бериш кунида Москва, бошқа шаҳарлар ва сайлов участкаларига, шунингдек, сайловни ташкил этишда иштирок этган муайян шахсларга катта дрон ҳужумини амалга ошириш орқали музокаралар жараёнини дарҳол қайта бошлаш имкониятини самарали равишда барбод қилди», деди Кремлнинг ташқи сиёсат бўйича ёрдамчиси Юрий Ушаков Трамп билан бўлган қўнғироқ ҳақида фикр билдираркан.
«Ва энди, президент айтганидек, биз бу музокараларни қачон қайта бошлаш мумкинлигини кўриб чиқамиз», дея қўшимча қилди у.
Ушаков шунингдек, Путин ва Трамп телефон қўнғироғи давомида йирик иқтисодий ташаббусларни, жумладан, Россия ёқилғисини етказиб бериш имкониятларини муҳокама қилганини айтди.
Трамп ҳам Truth Social'даги саҳифасида Путин билан жуда муваффақиятли музокарани якунлагани, энди Россия Америка ва глобал бозорга 300 минг тоннадан ортиқ дизел ёқилғисини етказиб беришини эълон қилди.
Унинг қўшимча қилишича, ноябр ойида яна 500 минг тонна, ундан сўнг дарҳол 1 миллион тонна дизел етказиб берилади.
«Россия дизелни қайта ишлаш заводларининг ҳолатидан келиб чиқиб, қисқа вақт ичида жами 3 млн тонна дизелни етказиб беради. Ҳўрмуз устидан назоратимиз ва Россия энергияси бўйича ушбу ажойиб эълон сабаб дизел нархлари дунёда рекорд даражада пасаяди», деб ёзди АҚШ президенти.
