АҚШ ва унинг иттифоқчилари Ироқдаги «Мустаҳкам қатъият» ҳарбий операциясини расман якунлади. Тегишли баёнотни Пентагон матбуот котиби Шон Парнелл эълон қилди. Операция 2014 йилда ИШИД террорчилик ташкилотига қарши курашиш мақсадида бошланган эди.
«Эрбил авиабазасидан коалиция кучлари ва техникасининг тартибли равишда олиб чиқилиши Ироқда ИШИД тор-мор этилган ҳарбий миссиянинг муваффақиятли якунланганини англатади» — деб таъкидлади Парнелл.
Операция «АҚШ ва Ироқнинг 2024 йил сентябрдаги қўшма баёнотига мувофиқ ва Американинг миллий манфаатларини таъминлаш мақсадида» якунланди, деб қайд этди расмий. Унинг сўзларига кўра, Пентагон Ироқ хавфсизлик кучлари, жумладан, Ироқ Курдистони энди «мамлакат хавфсизлигини янада ишончли таъминлашда» ва «террорчи гуруҳ қолдиқларини бостиришда» етакчи рол ўйнашини кутмоқда. АҚШ кадрлар тайёрлаш ва разведка маълумотлари билан ўртоқлашиш орқали ёрдам кўрсатишда давом этади, деб қўшимча қилди Пентагон вакили.
Америка қўшинлари 2003 йилдан бери Ироқда бўлиб келаётган эди. 2007 йилда терроризмга қарши операцияларнинг энг авж палласида уларнинг сони 170 минг кишидан ошди, шундан сўнг 2011 йилда минимал даражагача қисқартирилди. 2014 йилда террорчиларга қарши курашиш учун контингент яна кўпайтирилди ва 2021 йилга келиб жангарилар эгаллаб турган ҳудудлар устидан назоратни йўқотди. Ўшанда Ироқда 2,5 минг нафар АҚШ ҳарбий хизматчиси бор эди.
2024 йилда АҚШ ва Ироқ Америка қўшинларини босқичма-босқич олиб чиқиш бўйича келишувга эришган эди. 2026 йил июл ойида АҚШ президенти Доналд Трамп Ироқдаги америкалик ҳарбий хизматчилар иштироки энди «керак эмас»лигини маълум қилди.
