Ship 40'нинг саёҳати 24 июлда бошланган: Starship транспорт тизими SpaceX’нинг Техасдаги космодромидан учирилган.
Парвознинг асосий вазифаларини бажаргач, аппарат бошқариладиган тарзда атмосферага қайта кирган ва Ҳинд океанига қўнган. Бироқ кутилганидек парчаланиб ёки тезда чўкиб кетмаган — у сув юзасида қолиб, оқим бўйлаб силжишда давом этган.
SpaceX аппаратни қайтаришга қарор қилди
Космик парвоз ва сувга қўнишдан кейин сақланиб қолган аппарат компания учун қўшимча ўрганиш имкониятини яратган. SpaceX уни қуруқликка қайтаришга қарор қилган.
Муҳандислар Ship 40'ни текшириш орқали унинг конструкцияси атмосферага қайтиш ва океанга қўниш жараёнларини қандай ўтказганини батафсил ўрганиши мумкин.
Космик кемани денгиз кемаси ташиди
Ship 40 ярим чўкувчи Forte оғир юк ташувчи кемасига ортилган. Бундай кема юк олиш вақтида палубасини қисман сув остига туширади. Юк палуба устига келтирилгач, кема яна кўтарилиб, уни сувдан чиқаради.
Forte аппаратни Ҳинд океани орқали олиб ўтиб, Африкани айланиб ўтган ва Атлантика океани орқали Техасга етказган.
24 июлдаги парвоздан 7 октябрда Браунсвилл портига қайтишгача тахминан 75 кун ўтган. Бу муддат аппаратнинг океанда қолиши, уни олиб чиқиш ва денгиз орқали ташиш жараёнларини қамраб олади.
Ship 40 портдан SpaceX’нинг Starbase — «Юлдузли база» мажмуасига олиб борилади. У ерда аппарат парвоздан кейинги текширувлардан ўтказилади.
