SpaceX Ship 40’нинг янги суратларини эълон қилди. Аппарат ҳозир Megabay ангари ичида тик ҳолатда ўрнатилган. Унинг ёнида парвозга тайёрланаётган яна учта янги Starship кемаси бор.
Ship 40 ракеталар тизимининг 13-синов учирилиши доирасида 24 июл куни парвоз қилган. Суборбитал парвоз Ҳинд океанига бошқариладиган қўниш билан якунланган. Аппарат конструкциясининг катта қисми сақланиб, у сув юзасида қолган.
Шундан сўнг SpaceX уни базага қайтариш операциясини ташкил этган. Узунлиги 52 метр бўлган кемани нотинч денгизда 24 кун давомида шатакка олишган. Сафар шароити шунчалик қийин бўлганки, Илон Маск ҳам операцияни муваффақиятли якунлаш мумкинлигига шубҳа билдирган.
Август ойида Ship 40 Австралияга қарашли орол яқинига етказилган. У ердаги сокинроқ сувларда муҳандислар аппаратни кўздан кечириб, унинг пастки қисмидаги иссиқликдан ҳимоя қопламасидан намуналар олган.
Кейин Starship йирик ярим чўкувчи Forte транспорт кемасига юкланган. Кема 7 октябр куни Техасдаги Браунсвилл портига етиб келган. Шундан сўнг Ship 40 қуруқлик орқали Starbase мажмуасига олиб борилиб, ангарга жойлаштирилган.
Муҳандислар энди кемани батафсил текшириб, парвоз ва атмосферага қайта кириш унинг конструкцияси ҳамда иссиқликдан ҳимоя қопламасига қандай таъсир қилганини ўрганмоқчи. Олинган маълумотлар Starship тизимини янада такомиллаштиришда қўлланади.
