DW’нинг FT’га таяниб ёзишича, АҚШ маъмурияти вакиллари Украина ва Европа расмийларига қўнғироқ қилиб, Вашингтон талабини етказмоқда.
«Улар Киевга қўнғироқ қиляпти… улар ҳаммага қўнғироқ қиляпти», — деган АҚШ Мудофаа вазирлиги вакилидан шундай қўнғироқ олган амалдорлардан бири. У Европадаги расмийларни назарда тутган.
FT маълумотига кўра, америкалик расмийлар боғланган шахслар орасида Украина президентининг ҳарбий маслаҳатчиси, 93-алоҳида механизациялашган бригада собиқ қўмондони Павел Палиса ҳам бор.
PURL — «Украинанинг устувор эҳтиёжлари рўйхати» дастури бўлиб, Киевни қурол билан таъминлашга қаратилган. Хабарда дастур аллақачон тўхтатилгани эмас, уни блоклаш таҳдиди орқали босим ўтказилаётгани айтилмоқда.
Бу маълумотлар Трампнинг «энергетика бўйича сулҳ» ҳақидаги баёноти ортидан тарқалди. АҚШ президенти 11 октябр куни Россия ва Украина энергетика объектларига зарбаларни тўхтатишга рози бўлганини эълон қилган.
«Шу пайтдан бошлаб Россия ва Украина ўртасидаги урушда энергетика бўйича сулҳ жорий этилади. Ҳар икки томон бунга розилик берди. Уни бузманг!» — деб ёзган Трамп Truth Social’да.
Украина президенти Володимир Зеленский эса дастлаб Axios журналистига бундай қисман сулҳга эришилганидан хабари йўқлигини айтган. Бироқ Россия рози бўлса, ташаббусни қўллаб-қувватлашини билдирган.
Кейинроқ Зеленский Украина АҚШ томонидан тафсилотларни кутаётганини маълум қилган.
«Украина Қуролли кучлари барча буйруқларни олди. Ҳамкорларимизнинг бизга ёрдам бериши мумкин бўлган барча қадамларини қўллаб-қувватлаймиз. Американинг Россия билан мулоқотига оид аниқ тафсилотларни ва Путин президент Трамп айтган гапларни бажаришини кутяпмиз», — деган у.
Айни пайтда Зеленскийга яқин юқори мартабали украиналик амалдор FT’га сулҳ ҳақида «ҳеч ким эшитмаганини» билдирган. Шу боис Трамп эълон қилган келишувнинг аниқ шартлари ва уни амалга ошириш тартиби юзасидан саволлар очиқ қолмоқда.
FT, шунингдек, Зеленский Украинада сайлов ўтказиш имконини яратиш учун 60 кунлик тўлиқ ўт очишни тўхтатишга эришишни таклиф қилганини ёзган. Оқ уй Трамп Путинни бунга кўндириш таклифига қандай муносабатда экани ҳақидаги саволга жавоб бермаган.
