World Visualized инфографикаси Халқаро валюта жамғармасининг World Economic Outlook маълумотлари асосида тайёрланган. Таққослашда иқтисодиётлар ҳажми жорий нархлар ва АҚШ долларида ифодаланган номинал ЯИМ бўйича баҳоланган.
Келтирилган прогнозларга кўра, 2026 йилда жаҳон иқтисодиёти ҳажми тахминан 126,3 триллион долларга етади. Унинг қарийб 44 фоизи G7, 28 фоизи эса мазкур ҳисобдаги BRICS мамлакатлари ҳиссасига тўғри келади.
BRICS доирасида Хитой катта фарқ билан етакчилик қилмоқда. Мамлакатнинг номинал ЯИМ 20,85 триллион доллар атрофида бўлиши кутилмоқда. Бу бирлашма учун ҳисобланган умумий иқтисодий ҳажмнинг қарийб 60 фоизидир.
Иккинчи ўринда Ҳиндистон — унинг ЯИМ тахминан 4,15 триллион долларга баҳоланган. Россия ва Бразилиянинг ҳар бири учун кўрсаткич қарийб 2,6 триллион долларни ташкил этади.
Инфографикада ушбу тўрт мамлакатдан ташқари Индонезия, Саудия Арабистони, Бирлашган Араб Амирликлари, Жанубий Африка Республикаси, Миср, Эрон ва Эфиопия ҳам BRICS ҳисобига киритилган.
«Катта еттилик»да эса АҚШнинг устунлиги яққол кўринади. Унинг номинал ЯИМ 2026 йилда 32,38 триллион долларга етиши прогноз қилинган. Бу G7 умумий иқтисодиётининг қарийб бешдан уч қисмини ташкил этади.
АҚШдан кейин Германия туради — унинг иқтисодиёти 5,45 триллион долларга баҳоланган. Кейинги ўринларда Япония, Буюк Британия, Франция, Италия ва Канада жойлашган.
Бироқ иқтисодиётларни харид қобилияти паритети бўйича таққослаганда натижа ўзгаради. Ушбу усул мамлакатлардаги нархлар фарқини ҳисобга олади: бир хил миқдордаги пул турли давлатларда қанча товар ва хизмат харид қилиш имконини беришини инобатга олади.
Бундай ҳисобда ривожланаётган мамлакатлар иқтисодиётининг ҳажми одатда каттароқ кўринади. Жумладан, Хитой харид қобилияти паритети бўйича ЯИМ ҳажмида АҚШдан олдинда.
Мазкур инфографика эса айнан номинал ЯИМни таққослайди. Шу сабабли валюта курсларининг ўзгариши ҳам мамлакатларнинг доллардаги иқтисодий ҳажмига ва рейтингдаги ўрнига сезиларли таъсир қилиши мумкин.
Келтирилган рақамлар 2026 йилнинг якуний натижалари эмас, прогноз ҳисобланади. Янги маълумотлар келиб тушиши билан баҳолар қайта кўриб чиқилиши мумкин.
