Самарқанд давлат чет тиллар институти талабаси Комила Фарриева – Камерон Фарр билан суҳбатимиз тилларни ўрганишдан бошланиб, инсонлар ўртасидаги меҳр ва ишонч ҳақида давом этди.
«Дадам у ерларда келин ўғирлаш бўлади, деб қаршилик кўрсатганди»
Комила Фарриева АҚШнинг Жоржия штатида туғилиб ўсган. Ўзбекистонга келганига саккиз ой бўлган бўлса-да, бу ердаги ҳаёти ҳақида гапирар экан, унинг овозида самимий ҳаяжон сезилди.
Комиланинг айтишича, у болалигиданоқ тилларга қизиққан. Тўққиз ёшидан бошлаб хорижий тилларни ўрганишга жиддий киришган. Дастлаб испан ва немис тилларини ўзлаштирган, кейинчалик тил ўрганишга бўлган қизиқиши уни бошқа халқлар ва маданиятлар билан ҳам яқинлаштирган.
Унга кўра, ҳозир йигирмата тилда мулоқот қила олади, шулардан ўн биттасини мукаммал билади. Ўзбек тилини ҳам АҚШдаги афғон ўзбеклари билан мулоқот орқали ўрганган. Туркий тиллар билан бир қаторда япон тилини ҳам ўзлаштирган.
Тил ўрганишга шунчалик қизиқадиган қиз учун хорижда таълим олиш ҳам табиий танлов бўлган. Аммо у бунинг учун одатий йўналишни эмас, Марказий Осиёни, хусусан, Ўзбекистонни танлади.
Бу қарор ота-онаси учун кутилмаган эди. Дастлаб улар қизининг Ўзбекистонга боришига қарши бўлишган. Комила эса мамлакатнинг маданияти, одамлари ва ҳаёти ҳақида тушунтириб, уларни ўз танловига ишонтиришга ҳаракат қилган.
“Дастлаб дадам у ерларда келин ўғирлаш бўлади, деб қаршилик кўрсатди. Кейинчалик вазиятни тушуниб, мени бу ерга келишимга розилик билдирди. “Ўзингни эҳтиёт қилсанг бўлди”, деди”, - дейди Комила.
“Ўзбекистоннинг бувиларини яхши кўраман!”
Комила айни пайтда Самарқанд давлат чет тиллар институтида таҳсил олмоқда. Унинг айтишича, таълим усуллари ўзига маъқул келган, муҳит эса тилларни ўрганиш ва амалда қўллаш учун қулай.
Бироқ Самарқандни севиб қолишига фақат университетдаги таълим сабаб бўлмаган. У бу ерда одамлар билан мулоқот қилишни, маҳаллий ҳаётни ичидан ўрганишни яхши кўради.
“Ўтган бир неча ой ичида Ўзбекистонда бўлиб, ўзбек халқини жуда яхши кўриб қолдим. Жуда яхши одамлар, ёрдамларини аяшмайди. Айниқса, Ўзбекистонда катта оналар — бувилар жуда яхши экан. Улар меҳрибон ва ширинсўз.
