Зеленский – фермерлар душмани!
Демак Трамп нима деганини айнан келтирамиз. «Менимча, Украина келиша оладиган янги етакчи танлаши керак. Унда бир неча марта келишиш имкони бор эди, лекин бундай қилмади. Биз Россия билан билганингни қил, лекин нефт заводиларини урма, бу глобал муаммо келтириб чиқаради, дедик. У бизнинг фермерлар ва чорвадорларимиз учун муаммо туғдирмоқда. «Дизелга зарба берма», дедик, у эса бориб айнан дизелни уряпти». Ана шунақа, Зеленский бир ухлаб тургач америкалик чорвадорлар ва фермерларнинг «биринчи рақами душманига» айланди.
Трамп президентликка келишиёқ Киевда хавотир билан қаршиланганди, чунки унинг Москва билан муносабати сир эмасди. Трамп айнан Зеленскийга босим қилиши ортидан импичмент олишига сал қолганди. Киев хавотир олгандай бўлди, Трамп келиши билан урушни бошлашда Украинанинг ўзини айблади. Зеленскийга нисбатан қандай муносабатда эканини яширолмади ва ўтган йил февралда улар орасидаги адоват бутун дунё кўз ўнгида портлади. Трамп кек сақлайдиган одам, шу сабаб ҳозир яна бажонидил Зеленский орқали Украинага босим ўтказиш кампаниясини бошлаб берди.
Трамп ва унинг маъмуриятидаги мулозимлар аввал ҳам «Украинада сайлов ўтказиш кераклигини» айтиб чиққан, ўшанда ҳам бу масала Россия томонининг баёнотларидан кейин бошланганди. Лекин Киев уруш даврида сайлов ўтказа олмаслигини тушунтиргач, бу масала қайта кўтарилмай қолганди.
Трамп яна «Украинага янги лидер керак» деб қолгани эса тушунарли. У америкаликларни хавотирга солаётган дизел нархини тушириш учун Украинадан Россия нефт заводларига зарба беришни тўхтатишни сўради. Киев эса русларнинг нефт иншоотларини уришни давом эттирди. Кейин Трамп «Америка президентининг гапини икки қиладиган сенми ҳали», деб яна Россия томонга ўтди. Америка учун «тупканинг тагидаги» бу давлатдан «солярка» сотиб олишни бошлади.
Энди рус танкерлари Европа сувликларидан бемалол сузиб ўтиб, «Титаник» маршрути бўйлаб бутун Атлантикани кечиб, Америкага дизел олиб боради. Иқтисодчи бўлмаган одам ҳам америкалик фермерлар тракторни маккапоя ўришга далага чиқариши учун бунча олисдан дизел сотиб олиш шарт эмаслигини билади. Ахир Венесуэла нефти энди Вашингтон қўлида, Америка ҳам кўп нефт қазиб олади, жуда бўлмаса, Канада бор. Лекин Трамп айнан Украина президентига «АҚШ президентига йўқ дейишнинг оқибати қандай бўлишини кўрсатиб қўйиш учун» Россиядан «солярка» сотиб олишга буйруқ берди.
«Путин Truth Social'ни ўқимайди»
Кеча президент Трамп Truth Social'даги саҳифасида «Россия ва Украина энергетик сулҳга келишгани» ҳақида эълон қилди. Қизиғи, бу маълумот Россия томинидан ҳам, Украина томонидан ҳам тасдиқланмади. Зеленский НАТО форумида онлайн нутқ сўзларкан, Трампнинг бу постидан ҳайрон қолгани, у эълон қилинишидан кўп ўтмай Россия Харкивдаги электростанцияга зарба берганини айтди. Бу ҳақда гапираркан Россияни тролл қилишга ҳам улгурди. «Путин Truth Social'ни ўқимаслиги аниқ, унинг Shahed'лари бошқача инструкция бўйича ҳаракат қилади».
