2026 йил октябрида эълон қилинган АҚШ Конгресси ҳисоботида танишув иловаларидаги фирибгарлик ҳолатлари кўриб чиқилган. Конгресс Match Group ва бошқа компанияларни танишув иловаларидаги фирибгарлик қурбонларига кўпроқ ёрдам беришга чақирди. Қурбонлардан бири Мэри 2024 йилда танишув иловасида бир эркак билан танишади. У янги муносабатлар қуришни истаган эди. Аммо бу танишув уни қарийб 100 минг доллардан айирган романтик фирибгарлик билан якунланди.
Фамилияси ошкор этилмаслигини сўраган Мэрининг айтишича, дастлаб улар кўп гаплашган. Кейин эркак уни тинмай безовта қилиш, босим ўтказиш ва қайта-қайта пул сўрашни бошлаган. Воқеалар жуда тез ривожланган. Иловаларда унга ўхшаб алданган бошқа жабрланувчилар ҳам бор.
Романтик фирибгарлик – жиноятчилар жабрланувчилар билан муносабат ўрнатиб, улардан пул ёки совғалар олишга уринадиган фирибгарлик туридир. Сенаторлар бундай жиноятлар АҚШда молиявий фирибгарликнинг кенг тарқалган шаклларидан бирига айланганини ва америкаликларга йилига камида 1,3 миллиард доллар зарар етказаётганини билдирган.
Фирибгарлар миллионлаб фойдаланувчилар билан алоқа ўрнатган
2026 йил 14 октябр куни эълон қилинган ҳисоботда Match Group тақдим этган ички ҳужжатлар ва маълумотлар таҳлил қилинган. 2025 йилнинг иккинчи ярмига келиб, танишув иловалари фирибгарлар ва бошқа қоидабузарларни аниқлашда фойдаланадиган машинали ўрганиш моделларининг аксариятини бир неча йил давомида янгиламаган. Натижада платформа шубҳали аккаунтларни аввалгидек ишончли аниқлай олмаган.
Match Group тақдим этган маълумотлар яна бир ҳолатни кўрсатган: 2025 йилнинг учинчи чорагигача АҚШда Tinder ва Hinge платформаларидаги фирибгарлар ёки бошқа қоидабузарларга тегишли қарийб 1,5 миллион аккаунт камида битта фойдаланувчи билан топишган, яъни муносабат ўрнатган. Ушбу аккаунтларнинг қарийб 500 мингтаси бошқа фойдаланувчи билан алоқа маълумотларини ҳам алмашган.
«Улар сизни тинч қўймайди»
Мэри фирибгар билан мулоқот қилган пайтида унинг ҳақиқий шахс эканини аниқлашга уринган. Унинг айтишича, эркак доимий равишда алоқага чиққан ва Мэрининг қаерда яшашини ҳам билган. Эркак пул иши билан боғлиқ харажатлар ва шошилинч тиббий эҳтиёжлар учун кераклигини айтган.
«Улар сизни ҳеч қачон тинч қўймайди. Мен буни гирдобга тушиб қолишга ўхшатаман. Нима бўлаётганини ўзингиз ҳам сезмай қоласиз. Пул юборасиз, сумма эса кўпайиб бораверади. Лекин ҳар сафар пул юборганингизда бу олдинги тўловлар билан боғлиқдек туюлмайди. Ниҳоят, қанча пул йўқотганимни англаганимда ҳайратда қолдим», - деган у.
