Олимлар ички механизмни кўриш учун асалариларни инсон терисини тақлид қилувчи шаффоф гелга ниш санчишга ундаган. Юқори кадр частотасидаги микротасвирга олиш орқали ниш ичидаги майда қисмлар ҳаракати кузатилган. Тадқиқот тафсилотлари The Conversation нашрида баён қилинган.
Видео ва уч ўлчамли сканерлаш ниш ичида иккита митти, эгилувчан клапан навбатма-навбат ҳаракатланишини кўрсатган. Бир клапан пастга силжиганда парашют каби очилиб, заҳарни олдинга суради. Юқорига қайтганда эса соябон каби йиғилиб, иккинчи клапан ёнидан ўтади ва янги заҳар порцияси учун йўл очади.
Шу тарзда механизм икки поршенли насос каби ишлайди. Клапанларнинг мувофиқ ҳаракати заҳарнинг бир маромда юборилишини таъминлайди.
Асалари ниши терида қолиб кетганда, унга туташ заҳар қопчаси ва ҳаракатлантирувчи тузилмалар ҳам танадан ажралиши мумкин. Бу асаларига ҳалокатли шикаст етказса-да, ниш механизми қисқа вақт мустақил ишлашда давом этади.
Механизмни текшириш учун тадқиқотчилар 3D-принтерда унинг катталаштирилган, ишлайдиган нусхасини ҳам яратган. Бунда қаттиқ ва эгилувчан полимер материаллардан фойдаланилган.
Муаллифлар ушбу тузилиш келажакда ихчам тиббий микронасослар ва дорини тўқималарга аниқ етказиб берувчи қурилмаларни ишлаб чиқишга ёрдам бериши мумкинлигини таъкидламоқда.
