Натижалар RAS Techniques and Instruments журналида эълон қилинган. Олимлар оқ митти юлдузларнинг турли тўлқин узунликларидаги нурланишини инсон кўришини тақлид қилувчи рақамли моделлар орқали таҳлил қилган.
Гап яшил юлдузнинг оддий фотосурати ҳақида эмас. Ҳисоб-китоблар инсон уни яқин масофадан кузатганида қандай рангда кўришини аниқлашга қаратилган.
Оқ миттилар — Қуёш каби юлдузлар эволюциясининг охирги босқичида қоладиган ўта зич жисмлар. Уларнинг ўлчами Ерникига яқин бўлиши мумкин, аммо массаси Қуёш массасининг сезиларли қисмини ташкил этади.
Оддий юлдузларнинг ранги асосан ҳароратига боғлиқ. Оқ миттиларда эса ўта зич атмосфера ва ундаги кимёвий элементлар нурнинг айрим қисмларини кучли ютиб, ғайриоддий ранглар ҳосил қилиши мумкин.
WD J1330+6435 ҳарорати тахминан 4000 даража Цельсийга тенг. Бундай ҳароратдаги оддий юлдуз қизғиш-тўқ сариқ кўриниши мумкин эди. Аммо ушбу оқ митти атмосферасидаги натрий тўқ сариқ, кальций эса бинафша нурларни ютади. Натижада, моделга кўра, инсон кўзи қолган нурланишни оч яшил тусда қабул қилади.
Юлдузнинг умумий ёши тахминан 8,4 миллиард йил деб баҳоланган. Шундан қарийб олти миллиард йилини у оқ митти ҳолатида ўтказган.
Тадқиқотда бошқа ғайриоддий ранглар ҳам қайд этилган. Углеродга бой айрим оқ миттилар пушти ёки қирмизи-бинафша, совуқроқ водород-гелий атмосферага эгалари эса феруза ёки кўкимтир тусда кўриниши мумкин.
Шунга қарамай, бундай ранглар кам учрайди. Ўрганилган оқ миттиларнинг тахминан 3,4 фоизидагина оқ рангдан сезиларли фарқ қилувчи туслар аниқланган.
