18 октябрга ўтар кечаси Санкт-Петербург шаҳри ва Ленинград области дронларнинг йирик ҳужумини бошдан кечирди.
Петербург губернатори Александр Беглов Петербург нефт терминали ва «Ручи» нефт базасида дронлар зарбаси оқибатида ёнғинлар чиққанини тасдиқлаган. Ҳужум вақтида 12 та кўп қаватли уй ва иккита хусусий уй ҳам шикастланган. Бир киши ҳалок бўлиб, беш киши жароҳатланган, уларнинг барчаси шифохонага ётқизилган.
Шунингдек, Ozon компаниясининг Петербургдаги омбори (у ерда ёнғин чиққан, ходимлар жабрланмаган) ҳамда «ВКонтакте»нинг шаҳар ташқарисидаги дата-маркази зарба остида қолган.
Бундан ташқари, шаҳарда кемалар ўтишига мослаштирилган осма кўприк ҳамда «Восточная» электр нимстанцияси, шунингдек, Василевский оролидаги наркология шифохонаси зарбага учраган.
Ҳужум вақтида Петербургнинг бир қанча районлари электр таъминотисиз қолган. Пулково аэропорти вақтинча ёпилиб, йўловчилар ва ходимлар бомбапанагоҳларга олиб туширилган. Ҳозирга келиб аэропортда рейсларни жўнатиш ва қабул қилиш тикланган.
Ленинград областида ҳам аварияли ўчиш рўй бериб, 20 мингдан ортиқ киши токдан узилган.
Петербург шаҳри ва Ленинград областида ўнлаб автомобиллар ва уйлар шикастланган, бир киши ҳалок бўлиб, 15 киши жароҳатланган.
Россия мудофаа вазирлиги ҳисоботига кўра, тунда мамлакат бўйлаб 1015 та дрон уриб туширилган ёки тўхтатилган.
Петербург нефт терминали
