Канаданинг CBC News телерадиокомпанияси хабарига кўра, провинция ажралиб чиқиши тарафдорлари референдумда мағлуб бўлади. Овозга Албертанинг Канададан ажралиб чиқиши эмас, балки бу борада янги референдум ўтказиш керакми ёки йўқми деган масала қўйилган эди.
Elections Alberta веб-сайти маълумотларига кўра, сайловчиларнинг аксарияти — тахминан 76 фоизи «Алберта Канада провинцияси бўлиб қолиши керак» деган бандни танлаган. Канада таркибидан чиқиш жараёнини бошлаш учун провинция аҳолисининг тахминан 24 фоизи овоз берган.
«19 октябр куни Алберта аҳолиси аниқ танлов қилди. Улар бирликни, келажакни биргаликда қуришни ва бир-бирига ғамхўрлик қилишни танлади. Энг аввало, улар Канадани танлади», — деб дастлабки натижаларга изоҳ берди мамлакат бош вазири Марк Карни.
Референдумнинг тўлиқ натижалари сайлов участкалари ёпилганидан икки сутка ўтгач, якуний расмий натижалар эса 29 октябрда маълум бўлади.
Алберта бош вазири Даниэл Смит ажралиб чиқиш тарафдорлари 300 мингга яқин имзо тўплаган петицияга жавобан мустақиллик масаласини шу йилнинг май ойида сайлов бюллетенига киритган эди.
Алберта — Канаданинг асосий нефт ва газ қазиб олувчи провинцияси: мамлакатда қазиб олинадиган нефтнинг қарийб 80 фоизи унинг ҳиссасига тўғри келади. Шу билан бирга, хом нефт Канада экспортининг асосий маҳсулоти ҳисобланади: ўтган йили у 142 миллиард Канада доллари (100 миллиард АҚШ доллари) миқдорида даромад келтирган.
Канаданинг ғарбида жойлашган Алберта океанга чиқиш йўлига эга эмас ва у ердаги нефтнинг катта қисми АҚШ нефтни қайта ишлаш заводларига экспорт қилинади.
Мустақиллик тарафдорлари провинция марказий ҳукуматга жуда кўп пул бераётгани ва эвазига жуда кам нарса олаётганидан шикоят қилмоқда. Улар Алберта нефт захиралари ҳажми бўйича Венесуэла, Саудия Арабистони ва Эрондан кейин дунёда тўртинчи ўринда туришини эслатиб ўтмоқда.
