Расмийларга кўра, базадан тахминан бир километр масофадаги қуриган ўт-ўлан туташидан бошланган. Шундан кейин олов тезлик билан Канада қуролли кучларининг Уэйнрайтдаги базаси полигони бўйлаб тарқалган – бу база Алберт провинцияси пойтахти Эдмонтон шаҳридан тахминан 210 километр шарқда жойлашган.
Бу вақтда полигонда ҳарбий машғулот ўтказилаётганди. Эдмонтонда жойлашган 1-дивизия командири Уэйд Ратленд журналистлар билан мулоқотда айтишича, 96 км/соат тезликка чиққан кучли шамол туфайли ёнғин авж олган.
Генерал Ратленд тўсатдан эсган шамол ва унинг ортидан олов тарқалишини «ғайриоддий ва шиддатли» ҳодиса деб таърифлаган – аланга атиги 30-60 сонияда бир километр масофани босиб ўтди, деб ёзади Reuters. «Мен, албатта, ҳеч қачон бунақасини кўрмаганман», –дейди генерал.
Расмийлар қурбонларнинг шахсини очиқлаган: сержант Морган Вонг, оддий аскар Шон Фаррелл, оддий аскар Эйдан Гулдинг ва оддий аскар Ҳейден Ликкемарк.
Канада бош вазири Марк Карни ўз мурожаатида содир бўлган воқеани «тинчлик давридаги Канада ҳудудида қуролли кучлар сафида рўй берган энг оғир фожиалардан бири» деб атади.
«Мамлакат қуролли кучларимизнинг жасур ҳарбий хизматчиларини йўқотганимиз учун аза тутмоқда», – деди Карни. У ҳалок бўлганлар хотираси учун бутун мамлакат бўйлаб барча федерал бинолардаги давлат байроқларини туширишга буйруқ берган.
Алберта бош вазири Даниэл Смит маълум қилишича, жабрланганларнинг кўпчилигига «бир неча ҳафта ёки бир неча ой» давомида ихтисослаштирилган интенсив тиббий ёрдам кўрсатилади. Унинг маълумотига кўра, шифохонага ётқизилган 39 кишидан камида 19 нафари оғир аҳволда.
Ратленднинг сўзларига кўра, ёнғин бошланган пайтда енгил пиёдалар баталёнининг 85 нафар аскари даштда жойлашган базада ўқ-дорилардан фойдаланган ҳолда «юқори интенсивликдаги» ҳарбий тайёргарликдан ўтаётган эди. Бу аскарлар Канаданинг хориждаги энг йирик ҳарбий миссияси жойлашган Латвияга жўнаб кетиши керак эди.
«Машғулотларда Уэйнрайт ўқув маркази ҳудудида турли қуроллардан фойдаланилган», – деган генерал. Унинг аниқлик киритишича, гап гранатомётлар, гранаталар, ўқотар қуроллар ва ўқ-дорилар ҳақида боради.
