Самарқанд вилоятининг Иштихон туманида ЙПХ ходимининг қонуний талабига бўйсунмай, уни ҳақорат қилган техникум ўқувчилари аниқланди.
Ижтимоий тармоқларда тарқалган видеода бир неча ўсмир Malibu-2 русумли автомобилда Иштихон тумани кўчаларида ҳаракатланиб, ЙПХ ходимининг тўхташ талабига бўйсунмагани, машинани унинг устига ҳайдаб боришгани, шунингдек, ходимни ҳақоратлашгани ва воқеа жойидан қочиб кетганини кўриш мумкин.
Уларнинг ўзи бу ҳолатни видеога олган ва ижтимоий тармоқда тарқатган.
Ўрганишлар давомида қоидабузарликларни содир этган шахслар Каттақўрғон туманидаги 2-сонли техникум ўқувчилари экани аниқланган.
Улар машинани 1,2 млн сўмга ижарага олишган ва ҳайдовчилик гувоҳномаси бўлмаган ҳолда рулга ўтиришган.
Мазкур ҳолат машинани ижарага берган тадбиркор, болаларнинг ота-оналари, туман ҳокими ва ҳуқуқни муҳофаза қилувчи орган раҳбарлари иштирокида танқидий муҳокама қилинган.
Самарқанд вилояти ЙҲХБ матбуот хизмати эълон қилган видеода ўқувчилар кўз ёш тўккан ҳолда ҳақорат учун ЙПХ ходимидан узр сўрашган.
Ҳолат юзасидан Иштихон тумани ички ишлар бўлими томонидан тегишли ҳужжатлар расмийлаштирилган. Тўпланган материаллар қонуний қарор қабул қилиш учун прокуратура органларига юборилган.
