1 ноябр куни Флорида штати Палм-Бич округида Learjet 60 русумли хусусий самолёт ҳалокатга учради. Бизнес-жет АҚШ президенти Доналд Трампнинг Мар-а-Лагодаги қароргоҳидан тахминан 10 километр масофада, автотрасса ёқасига қулаган. Самолёт бортида тўққиз киши, жумладан, икки бола бор эди, уларнинг барчаси ҳалок бўлган.
Шунингдек, самолёт қулаган жой яқинида бўлган автомобил ҳайдовчиси жабрланган. Самолёт қулаган жойда чуқур ўра ҳосил бўлган.
Ҳалокат рўй берган ҳудуддаги Green Acres трейлер паркидан бир неча юз киши эвакуация қилинган.
Самолёт Техас штати Остин шаҳридан ҳавога кўтарилиб, Баҳама оролларига кетаётганди. Самолёт бортида IT-тадбиркор, миллиардер Адам Робинсон, унинг рафиқаси Ҳелен Шарп ва уларнинг икки фарзанди – тўрт ёшли Эмма ва икки ёшли Чарли бор эди. Улар билан бирга энага Анита Мария Сетина ҳамда оила дўстлари ҳисобланган Рэйчел Рид ва Чарми Фер ҳам учаётганди.
Робинсон 44 ёшда эди. У Retention.com ва RB2B дастурий таъминот ишлаб чиқарувчи компанияларга асос солган, бу компанияларнинг бош директори лавозимида эди.
Самолёт экипажи икки учувчидан иборат эди – Пенсилвания штатидан бўлган тажрибали учувчи, 55 ёшли капитан Жефф Грегори ҳамда иккинчи пилот, 20 ёшли (айрим манбаларга кўра, унинг ёши 21 да эди) Наталия Фигейрас. Ҳалокатдан олдин айнан Фигейрас диспетчерлик хизмати билан мулоқот олиб борган.
Фигейрас самолёт бошқаришга лицензияни 17 ёшида олган. Флоридада истиқомат қилган ушбу қиз маҳаллий телеканалларга берган интервюсида синфдошлари автомобил ҳайдашга ҳавас қилиб юрганида, самолёт бошқаришни «зўрроқ» деб ҳисоблаганини айтиб берганди. 2026 йил 1 ноябригача Фигейраснинг 1300 соатлик парвоз тажрибаси бўлган.
Қайд этилишича, парвоз мураккаб об-ҳаво шароитида амалга оширилган. Парвоз давомида экипаж диспетчерларга борт ташқарисидаги ҳарорат Целсий бўйича минус 47 даражани ташкил этаётгани ва фюзеляж музлагани, шунингдек, турбулентлик кузатилаётганини маълум қилиб, баландликни оширишга рухсат сўраган.
Диспетчер юқорига кўтарилишга рухсат берган, аммо экипаж бу хабардан тахминан ярим дақиқа ўтиб фавқулодда ҳолат тўғрисида хабар юборган – самолёт кескин ва назоратсиз тарзда шўнғиган (дақиқасига 10 минг фут – 3 минг метр). Жет учувчисининг сўнгги гапларидан бири шундай бўлган: «Биз ҳозир ерга уриламиз». Фигейрас яна шундай қичқиради: «Ташқарига қара».
