Топилма Помпейнинг асосий кўчаларидан бирида жойлашган, анъанавий равишда Корнелий Максимус уйи деб аталадиган бинода аниқланган. Помпей археология боғи ходимлари бу ерда қадимги римликларга хос «армарий» — буюмлар сақлаш учун мўлжалланган шкаф қолдиқларини ўрганган.
Ёғоч шкаф бутун ҳолича сақланмаган. Бироқ қазишма маълумотлари асосида унинг дастлабки кўринишини тиклаш ва ичида қандай буюмлар бўлганини аниқлашга муваффақ бўлинган. Тадқиқот натижалари E-Journal degli Scavi di Pompei онлайн нашрида эълон қилинган.
Энг эътиборли топилмалардан бири — камида 24 та митти осма безакдан иборат тўплам. Бир вақтлар маржон таркибига кирган бу буюмларнинг ҳар бирида ип ўтказиш учун тешик бўлган. Улар фаянс, суяк, шиша массаси ва тоғ биллуридан ясалган.
Безакларда Бес ва Меркурий маъбудлари, инсоннинг қўл панжалари ва оёқ кафтлари, қарағай ғуддалари ҳамда узум бошлари тасвирланган. Археологлар уларни «крепундия» (crepundia) деб аталадиган буюмлар турига киритган. Бу атама лотинча crepare — «жарангламоқ», «овоз чиқармоқ» феълидан келиб чиққан.
Қадимги Римда бундай тақинчоқлар болалик билан боғлиқ бўлган. Тадқиқотчиларнинг фикрича, улар икки вазифани бажарган бўлиши мумкин. Бир томондан, болани ёмонликлардан асрайди, деб ишонилган тумор сифатида тақилган. Иккинчи томондан, ҳаракат пайтида овоз чиқариб, шақилдоқ вазифасини ўтаган. Бу товуш катталарга кичкина боланинг қаерда ҳаракатланаётганини билишга ёрдам берган бўлиши мумкин.
Кўплаб римликлар болаликдаги бундай тақинчоқларини умр бўйи асраб, қутича ёки мато халтачада сақлаган. Помпейдан топилган маржон ҳам шкаф ичидаги чириб кетган халтачада ётган.
Ўша даврда одамлар бир жойдан бошқасига кўп кўчган, айримлари ота-онаси ва туғилган юртидан узоқда яшаган. Шу сабабли болалик тумори инсонга уйини ва яқинларини эслатиб турадиган кам сонли буюмлардан бири бўлган бўлиши мумкин.
Шкафдан аёлларнинг пардоз ва шахсий парваришига оид буюмлар ҳам чиққан. Улар орасида пинцет, косметик моддаларни эзиб аралаштириш учун ишлатилган мослама — coticula, атир ёки малҳам солинадиган шиша идиш, хушбўй моддалар тутатиш идиши ва бронза мойчироқ бор.
Мойчироқ ёнида қўрғошиндан ясалган тарози тошлари ҳам ётган. Улар деярли бутунлай чириб кетган кичик ёғоч қутичада сақланган. Олимларнинг тахминича, бу буюмлар уйда қандайдир савдо фаолияти олиб борилганидан дарак бериши мумкин. Бироқ уларнинг айнан нима учун ишлатилгани ҳозирча аниқ эмас.
