Интернетга кириш имконияти замонавий ҳаётнинг ажралмас қисмига айланди. Бироқ миллиардлаб одамлар ҳали ҳам рақамли дунёдан четда қолмоқда.
Ушбу инфографикада турли мамлакатларда интернетдан фойдаланувчилар улуши кўрсатилган. Уни тайёрлашда Халқаро электр алоқаси иттифоқининг (International Telecommunication Union, ITU) 2025 йилги маълумотлари асос қилиб олинган. Бу даврга оид маълумотлари мавжуд бўлмаган мамлакатлар учун 2024 йилги кўрсаткичлардан фойдаланилган.
Баҳрайн, Кувайт, Саудия Арабистони ва Бирлашган Араб Амирликларининг барча аҳолиси интернетга тўлиқ кириш имконига эга. Дания (99,8 фоиз) ва Люксембург (99,1 фоиз) ҳам аҳолининг деярли барчасини интернетдан фойдаланиш имконияти билан таъминлашга яқинлашган. Рейтингнинг қарама-қарши томонида Афғонистон турибди: бу ерда аҳолининг атиги 16,1 фоизи интернетдан фойдаланади. Ушбу кўрсаткичлар рақамли тармоққа уланиш даражаси энг юқори ва энг паст бўлган мамлакатлар ўртасидаги улкан тафовутни яққол намоён этади.
Интернетдан фойдаланиш имконияти бўйича энг катта тафовутларнинг айримлари Африканинг Саҳройи Кабирдан жанубдаги мамлакатларида кузатилади. Нигерияда аҳолининг 41,2 фоизи, Кенияда 35 фоизи, Замбияда эса атиги 29,7 фоизи интернетдан фойдаланади.
Асосий тўсиқлар орасида телекоммуникация инфратузилмасининг етарлича ривожланмагани ва мобил интернет нархининг юқорилиги бор. Бу муаммолар, айниқса, қишлоқ жойларда кескин сезилади, чунки у ерларда тармоқларни қуриш ва кенгайтириш қимматга тушади. Рақамли тенгсизликни қисқартириш учун тармоқлар қамровини кенгайтиришнинг ўзи етарли эмас. Интернетдан фойдаланишни аҳоли учун ҳамёнбоп қилиш ҳам шунчалик муҳим.
Интернетдан фойдаланиш даражаси энг юқори бўлган айрим мамлакатлар Осиёда жойлашган. Малайзияда аҳолининг 98,3 фоизи, Сингапурда 97,4 фоизи, Жанубий Кореяда эса 96,1 фоизи интернетдан фойдаланади. Айни пайтда Ҳиндистонда бу кўрсаткич 70 фоизни, Филиппинда эса 67,3 фоизни ташкил этади.
GSM ассоциацияси маълумотларига кўра, Осиё-Тинч океани минтақасидаги ривожланаётган мамлакатларда мобил тармоқлар кенг тарқалганига қарамай, қарийб 1,2 миллиард киши ҳали ҳам интернетга кириш имконига эга эмас. Бу қурилмаларни харид қилиш имконияти, рақамли саводхонлик даражаси ва мобил интернет трафиги нархи тармоқ қамровининг мавжудлигидан кам бўлмаган аҳамиятга эга омиллар эканини кўрсатади.
Европа ривожланган телекоммуникация инфратузилмасига эга ҳамда рақамли хизматлардан фойдаланиш имкониятларини кенгайтириш бўйича мувофиқлаштирилган сиёсат олиб бормоқда. Россия (95,6 фоиз), Канада (94,4 фоиз), АҚШ (94,7 фоиз) ва Австралия (96,1 фоиз) ҳам юқори кўрсаткичларга эга. Ушбу мамлакатлар рақамли ривожланиш даражаси бўйича ҳам жаҳон етакчилари қаторига киради. Бироқ уларнинг қишлоқ ҳудудларида интернетга уланиш билан боғлиқ муаммолар сақланиб қолмоқда.
