«Онамни узоқдан бўлса ҳам кўрсам...» – болаликдаги танловнинг оғир армони
|22:101 9678 мин
Азиза 10 ёшида ота-онаси ажрашганда отаси билан қолишни ўзи танлаган. Ўшанда бу қарор уни қандай ҳаёт кутаётганини билмаган боланинг танлови эди. Кейинги йилларда у зўравонлик, муҳтожлик ва йўқотишларни бошдан кечирди.
Йўл-транспорт ҳодисасида оёғи синган Азиза ҳали тўлиқ соғаймаган. Шифокорлар унга юришни чеклашни буюрган, аммо фарзандларини боқиш зарурати бунга имкон бермайди. Курерлик қилиб рўзғор тебратаётган аёл буюртмачилардан бир нарсани — буюртмаларини пастга тушиб қабул қилиб олишни сўрайди.
Унинг ҳаёти эса оддий курерлик машаққатларидан анча оғирроқ.
Кўчаларда шошилиб юрган, елкасида буюртма қутисини кўтариб, эшикма-эшик овқат етказиб бераётган курерларни ҳар куни учратамиз. Биз учун улар буюртмамизни ўз вақтида етказиши керак бўлган хизмат кўрсатувчи инсонлар. Аммо уларнинг ҳар бири ортида қандай тақдир, қандай дард ва қандай орзулар яширинганини билмаймиз.
30 ёшли Азиза Аҳмадова ҳам шундай инсонлардан бири.
Унинг оёғи авария оқибатида қаттиқ шикастланган. Бир неча марта операция қилинган, ҳали ҳам бемалол юра олмайди. Шундай бўлса-да, у ишлашга, фарзандларини боқишга ҳаракат қиляпти. Азиза учун бугунги ҳар бир буюртма — рўзғорига оз бўлса-да даромад, фарзандларининг дастурхонига насиба.
Аммо унинг ҳаётидаги энг оғир жароҳат оёғида эмас, қалбида.
Болаликдаги танлов ва бир умрлик армон
Азиза 1996 йилда Жиззах шаҳрида туғилган. У 10 ёшга тўлганида ота-онаси ажрашади. Судда ким билан қолиши сўралганда, у отасини танлайди.
«Дадамнинг яхши гапларига учиб, "қизим, қизим" деб яхши гапирганларига мен дадам билан қоламан деб судда дадамда қолганман», — дея эслайди у.
Аммо бу танловдан кейин уни оғир кунлар кутаётган эди.
Азизанинг айтишича, дастлаб ўгай онаси унга яхши муносабатда бўлган. Бироқ кўп ўтмай муносабат ўзгарган. У ўгай онаси томонидан калтакланганини, отаси ҳам унга қўл кўтарганини айтади.
«Ўгай онам мени супурги билан урарди, лопатканинг дастаси билан урарди. Иш қилсам ҳам қилмади деб дадамга урдирарди. Охири уйдан қочадиган одат чиқардим».
Унинг сўзларига кўра, баъзан уйда овқат ҳам берилмаган. Қорнини тўйдириш учун маҳалладаги савдо қилувчи аёлга ёрдамлашиб, эвазига бир коса овқат ва нон олган кунлари бўлган.
Орадан йиллар ўтди. Азиза улғайди, оила қурди, фарзандли бўлди. Лекин болаликдаги ўша қарор ҳамон юрагини тирнайди.
Турмуш ўртоғини сақлаб қолиш учун ҳар қандай ишга тайёр эди
Мавзуга оид
Азизанинг турмуш ўртоғи юк машинаси ҳайдовчиси бўлган. Бир куни йўлда содир бўлган оғир авария унинг ҳаётини ўзгартириб юборади.
Азизанинг сўзларига кўра, эри олдиндаги юк машинасига урилмаслик учун рулни бурган, оқибатда машина ағдарилиб, ўзи оғир жароҳат олган. Соғлиғидаги муаммолар сабаб ишлай олмай қолган эркак кейинчалик ичкиликка ҳам ружу қўйган.
Кейин унда жигар циррози аниқланган. Азиза эрини даволатиш учун қўлидан келган барча ишни қилганини айтади.
«Кўчада баклажка ҳам тердим, картон қути ҳам тердим. Керак бўлса, ошхоналарга кириб идиш ювдим, пол артдим. Керак бўлса, бировларнинг ҳожатхонасигача ювиб тозаладим. Мана шу хўжайинимни тузатиш учун. Қўлимдан нима иш келса, ҳаммасини қилиб кўрдим».
Аммо барча уринишларга қарамай, турмуш ўртоғи вафот этади. Ўшанда Азиза энг кичик фарзандига олти ойлик ҳомиладор эди.
Эрининг ўлими унга қаттиқ таъсир қилади. Бир муддат бу йўқотишни қабул қила олмайди. Кейин эса фарзандлари учун яшаш кераклигини англайди.
«Бошида хўжайиним ўтиб қолганда мен бу нарсани кўтаролмадим. Умуман қабул қилолмадим. Роса қийналдим, сиқилдим. Охири ўзимни ўзим ушладим. Қўй, мана шу фарзандларинг учун яша, дедим».
Ижара уйларидан кўчагача...
Турмуш ўртоғидан айрилган аёл учун энг оғир синовлардан бири фарзандларини боқиш ва бошпана топиш бўлди.
Азизанинг айтишича, ижара ҳақини тўлашга имконияти бўлмаган пайтларда фарзандлари билан уйдан чиқариб юборилган. Ҳатто қорли, ёмғирли кунларда кўчада қолишга мажбур бўлган.
Шундай кунларда ҳам у таслим бўлмаган. Иш излаган, меҳнат қилган, фарзандларига озиқ-овқат етказишга уринган.
У оғир пайтларда ёрдам қўлини чўзган инсонларни ҳам миннатдорлик билан эслайди. Айрим шифокорлар, йўлда учратган ички ишлар ходимлари, яхшилик қилган таниш ва нотаниш одамлар унга моддий ва маънавий кўмак беришган.
Синган оёқ билан курерлик
Азиза бугун овқат етказиб бериш хизматида ишлайди. Аммо бир неча ой аввал скутерда ҳаракатланаётганда йўл-транспорт ҳодисасига учраган.
Унинг айтишича, автомобил билан тўқнашмасликка ҳаракат қилганида скутери ағдарилган ва оёғи қаттиқ шикастланган.
Шифокорлар унда ўнг катта болдир суягининг очиқ синиши кузатилганини, операция давомида суяк металл пластина ва шуруплар билан маҳкамланганини маълум қилди.
Кейинчалик жароҳат асоратланиб, яна операция қилишга тўғри келган. Шифокорлар Азизанинг ҳозирги ҳолатида ҳаракатни чеклаш ва белгиланган ортопедик тартибга амал қилиш зарурлигини таъкидламоқда. Акс ҳолда жароҳат асоратлари давом этиши мумкин.
Азиза эса яна соғайиб, аввалгидек юришни орзу қилади.
«Мана шу оёққа туришни хоҳлайман. Олдингидек ўзимнинг оёқларим билан юришни хоҳлайман».
У буюртмачиларга ҳам бир илтимос билан мурожаат қилади: агар буюртма юқори қаватга етказилиши керак бўлса, имкони борича пастга тушиб, уни қабул қилиб олишларини сўрайди.
Чунки ҳар бир зина унга оғриқ беради. Аммо унинг ўзи учун энг муҳими — соғайиш ва фарзандлари учун меҳнат қилиш имкониятига эга бўлиш.
«Онажон, сизни яхши кўраман...»
Суҳбат давомида Азизадан энг катта орзуси нима экани сўралди.
У бу саволга бойлик, уй-жой ёки яхши иш ҳақида гапириб жавоб бермади.
«Тўғриси, энг катта орзуим – онажонимни охирги марта бир марта бўлса ҳам юзларини кўриш. Онамни бир марта бўлса ҳам, узоқдан бўлса ҳам юзларини кўришни хоҳлайман. Бориб қучоқлай олмасам ҳам, узоқдан бўлса ҳам».
Азизанинг айтишича, онаси кейинчалик бошқа оила қурган. Улар ўртасидаги алоқа узилган. Онаси билан кўришишга уринишлари ҳам натижа бермаган.
Агар онаси бу суҳбатни кўраётган бўлса, унга нима дейиши сўралганда, Азиза шундай жавоб берди:
«Онажон, сизни яхши кўраман, деган бўлардим. Ёшлигимда ёшлик қилиб дадамнинг ширин гапларига учиб сизни ташлаб кетганимга кечиринг, деган бўлардим. Мана шу онамдан кетганимдан кейин, ишонинг, бошимга тушмаган кун қолмади. Хуллас, азоб кўрдим, қийинчилик кўрдим. Барибир ҳам, минг қилса ҳам, ўзингизнинг онангиздек бўла олмас экан ҳеч ким. Ўз онангизнинг меҳрини бера олмас экан ҳеч ким».
У болалигида ўзига озор берган отасидан ҳам бутунлай юз ўгирмаган. Келажакда уни Умра зиёратига жўнатиш нияти борлигини айтади.
Ҳали ҳаммаси яхши бўлишига ишонади
Азиза ҳаётда кўп нарсасини йўқотган. Болаликдаги хотиржамликни, она меҳрини, турмуш ўртоғини, соғлиғини...
Бироқ у ҳали умидини йўқотмаган.
Фарзандлари учун яшаяпти. Қийналса-да, меҳнат қилишга интиляпти. Бир кун келиб соғайишига, бемалол юришига, ҳаёти изга тушишига ишонади.
Унинг орзулари орасида онасини кўриш, ота-онасини рози қилиш ва муқаддас Макка ҳамда Мадина шаҳарларини зиёрат қилиш ҳам бор.
Эҳтимол, Азиза буюртмангизни етказиб бериш учун эшигингизга келгандир. Эҳтимол, сизга ҳам қўнғироқ қилиб, пастга тушишингизни сўрагандир.
Энди бундай илтимос ортида қандай оғир ҳаёт ҳикояси бўлиши мумкинлигини биласиз.
Азиза эса ҳали ҳам бир кун келиб ҳаммаси яхши бўлишига ишонади. Энг муҳими, у ўша кунга етиб бориш учун курашишдан тўхтагани йўқ.
PS: Азизага ёрдам қўлини чўзмоқчи бўлганлар учун унинг карта рақамини қолдирамиз: 9860160606557041 Азиза Аҳмадовага тегишли.
