NASA барча хоҳловчиларни Сатурннинг йўлдоши — Титанга ўз исмини юборишга таклиф қилди. Ушбу йўлдошни кенг кўламли Dragonfly миссияси доирасида учувчи аппарат ўрганиши режалаштирилган. Агар ҳаммаси режа бўйича кетса, аппарат Титанга 2034 йилда етиб боради.
Одамларни Қуёш тизимининг олис ҳудудларига юборишга, эҳтимол, ҳали анча вақт бор. Бироқ ҳар ким ўз исмини Титанга юбориши мумкин. Бу йўлдош юзасида ҳаёт пайдо бўлиши учун зарур кимёвий таркибий қисмлар мавжуд. Dragonfly миссияси уларни ўрганишга ёрдам беради.
Dragonfly — йўлтанламас автомобиль катталигидаги, ядровий энергияда ишлайдиган ва кўтарувчи парраклар билан жиҳозланган учувчисиз учиш аппарати. NASA уни 2028 йилда Титан томон учиришни режалаштирмоқда. Яқинда АҚШ космик агентлиги махсус саҳифа очди. Унда барча хоҳловчилар аппарат бортида юбориш учун ўз исмини қолдириши мумкин. Иштирокчиларнинг исмлари Dragonfly йиғилаётган пайтда махсус чипга ёзилади. Аризалар 2027 йил 15 январгача қабул қилинади.
NASA миссиянинг «одатий йўналиши» бўлмаслигини таъкидлади: 2034 йилда Титанга етиб боргач, Dragonfly йўлдошнинг бир-биридан бир неча километр узоқликда жойлашган турли ҳудудлари ўртасида учиб юради.
Dragonfly бошқа осмон жисмида ишлайдиган саноқли учувчи аппаратлардан бири бўлади. Уларнинг биринчиси 2021 йилда Perseverance марсоходи билан бирга Марсга етиб борган кичик Ingenuity вертолёти эди. Perseverance ҳозир ҳам ишини давом эттирмоқда. Ingenuity дастлаб атиги бешта парвоз учун мўлжалланган бўлса-да, 72 марта парвоз қилди. Унинг миссияси 2024 йил 18 январда қўниш вақтида кўтарувчи винт парраклари шикастлангач якунланди.
Ҳозир NASA Марс учун SkyFall номли яна бир вертолёт миссиясини ишлаб чиқмоқда. Унда учта аппаратдан фойдаланиш назарда тутилган. Миссия Қизил сайёра томон 2028 йил охиридаёқ йўл олиши мумкин.
Бироқ Dragonfly Титанга йўналтирилган биринчи миссия бўлмайди. Ундан аввал Huygens зонди Cassini космик аппаратидан ажралиб чиқиб, 2005 йил 14 январда йўлдошга қўнган. Зонд унинг юзасида бор-йўғи бир неча соат ишлаган бўлса-да, атмосферада ўлчовлар ўтказишга ва бевосита Титанда маълумотлар тўплашга улгурган. Huygens Қуёш тизимининг ташқи қисмидаги осмон жисмига етиб борган биринчи қўниш аппарати бўлган.
Cassini ўз миссияси 2017 йил сентябрда якунлангунга қадар Титан ёнидан 100 мартадан ортиқ учиб ўтган. Аппарат орбитадан ва йўлдошга яқинлашиш пайтида у ҳақда қимматли маълумотлар тўплаган. Энди Dragonfly Титанни бевосита унинг юзасида ва ҳаводан туриб, Ер ҳисоби бўйича тахминан 3,3 йил давомида ўрганиши керак.
