"Yarova to‘plami" MTS va "Megafon" aksiyalariga salbiy ta'sir ko‘rsatdi

Rossiya prezidenti Vladimir Putinning "Yarova to‘plami" deb nomlanuvchi terrorizmga qarshi kurash choralari to‘g‘risidagi qonun hujjatlari to‘plamini imzolashi, Rossiyada faoliyat yurituvchi MTS va "Megafon" mobil aloqa kompaniyalarining qimmatbaho qog‘ozlari narxiga salbiy ta'sir ko‘rsatdi. Moskva birjasi savdolariga oid axborot shunday deyishga asos bo‘lmoqda. 

Xususan, Moskva vaqti bilan soat 13:15da MTS aksiyalari 3,3 foizga,  "Megafon" qimmatli qog‘ozlari 1,7 foizga arzonlashgan. Qonun to‘plami imzolangani to‘g‘risidagi xabarlardan avval, bu kompaniyalarning aksiyalari 2 foiz qimmat bo‘lgan. 

Rossiyada qabul qilingan yangi terrorizmga qarshi kurashga doir qonunlar to‘plamiga ko‘ra, aloqa operatorlari va internet-kompaniyalar foydalanuvchilarning muloqotlari va ularning mazmuniga oid xabarlarni, o‘zaro yozishmalarini saqlashi va maxsus xizmatlar talab qilgan taqdirda ularni taqdim etishlari kerak bo‘ladi. Aloqa kompaniyalari esa, ushbu qonun tufayli mobil aloqa xizmati narxi 2-3 martaga qimmatlashishi mumkinligidan ogohlantirishgan edi.