Turkiya Germaniyani «madaniy irqchilik»da aybladi

Turkiyaning Yevropa ishlari bo‘yicha vaziri Umar Chelik Germaniyaning Yevropa Komissiyasidagi vakili Gyunter Ettingerning bayonotiga munosabat bildirib, uni «madaniy irqchilik», deb atadi. Ettinger, Turkiya Erdo‘g‘an davrida YeIga a'zo bo‘lishi borasida shubha bildirgan edi, deb xabar qilmoqda Anadolu agentligi.

Xabarlarga ko‘ra, YeIning raqamli iqtisodiyot va jamiyat masalalari bo‘yicha komissari Gyunter Ettinger Bild nashriga bergan intervyusida, Turkiyaning YeIga a'zo bo‘lish shartlaridan biri Rajab Toyyib Erdo‘g‘anning prezidentlik lavozimidan ketishi ekanini bildirgan edi. 

«Ehtimol, bu masala Erdo‘g‘andan keyin dolzarb mavzuga aylanar», — deb bayonot bergan Ettinger.

U, shuningdek, yaqin orada Turkiyaga vizasiz tartib joriy qilinmasligini ham bildirgan. 

Iyul oyi oxirlarida, Yevroparlament Turkiyaga vizasiz tartibni taqdim etishga qarshi ovoz berishi mumkinligi aytilgandi.