Amerikalik milliarder va atrof-muhit himoyachisi Duglas Tompkinsning bevasi Argentinaga 23,7 ming gektar yer hadya qildi. Respublika prezidenti Maurisio Makrining ma'lum qilishicha, yer maydonlari mamlakatning shimoli-sharqidagi Korriyentes provinsiyasida yaratilishi rejalashtirilayotgan Iberning Ekosayyohlik parkiga qo‘shiladi.
Davlat rahbari tabiatni muhofaza qiluvchi yangi loyiha Argentinadagi eng katta milliy park bo‘lishini ta'kidladi. Hukumat rejasiga ko‘ra, parkning yaratilishi qo‘shimcha sayyohlar oqimini jalb qiladi va 20 ming yangi ish o‘rinlari yaratilishini ta'minlaydi. Yaqin uch yilda Kristin Makdevit-Tompkins boshchiligidagi Conservation Land Trust fondi Argentina hukumatiga yana 120 ming gektardan ortiq yer tortiq qilishi rejalashtirmoqda.
2016 yilning yanvarida Makdevit-Tompkins mamlakat janubida milliy park yaratilishi sharti bilan Chili davlatiga 400 ming gektar yer sovg‘a qilishi haqida ma'lum qilgandi.
Amerikalik millioner North Face va Esprit libos rusumlari asoschilaridan biri bo‘lgan. 1980 yillarda u tadbirkorlik faoliyatini tugallab, Chili janubiga ko‘chib o‘tgan va tabiatni muhofaza qiluvchi loyihalar bilan shug‘ullangan. Tompkins kelajakda milliy parklar yaratish maqsadida Chili va Argentina Patagoniyasida katta hududlarni xarid qilgan.
Millioner 2015 yilda sovuq o‘tishi natijasida halok bo‘lgan. U hamda bir necha sayyoh bo‘lgan qayiq Chili va Argentina chegarasidagi Heneral-Kerrera ko‘lida ag‘darilib ketgan. Vertolyotda yetib kelgan qutqaruvchilar 72 yoshli Tompkinsni shifoxonaga yetkazishdi, biroq uning hayotini saqlab qolishning iloji bo‘lmagan.
