Pora olishda ushlangan Ulyukayevga uni kuzatib turish uchun elektron bilaguzuk taqiladi

16 noyabrda Rossiya sobiq iqtisodiy rivojlanish vaziri Aleksey Ulyukayevga uni uy qamog‘ida bo‘lishi vaqtida kuzatishga imkon beruvchi elektron bilaguzuk (braslet) taqiladi. Bu haqda RIA “Novosti” axborot agentligi xabar bermoqda.

Avvalroq Moskvaning Basman tuman sudi yirik miqdorda pora olishda ushlangan vazirni uy qamog‘iga olishga qaror qilgandi. Rossiya tergov qo‘mitasi ma'lumotlariga ko‘ra, sobiq vazir "Rosneft" kompaniyasiga "Bashneft" kompaniyasi aksiyalarini sotib olishga imkon bergan ijobiy baho uchun 2 mln dollar pora olishda ushlangan.

"Sud ko‘rsatmasiga ko‘ra, Ulyukayev uy qamog‘i vaqtida kuzatishga imkon beradigan elektron bilaguzuk taqib yuradi. Chorshanba kuni mutaxassislar uning kvartirasida maxsus qurilma o‘rnatishadi, shundan keyin unga bilaguzuk taqiladi", deb ma'lum qilindi huquq-tartibot muassasalarida.