Rossiyada sud sobiq vazirni uy qamog‘ida qoldirdi

Moskva shahar sudi Rossiya Iqtisodiy rivojlanish sobiq vaziri Aleksey Ulyukayevning uy qamog‘ida saqlanishini qonuniy deb tan oldi, xabar bermoqda RIA «Novosti».

Shuningdek, sud himoya tarafining Ulyukayevga har kuni ikki marotaba sayr qilish va matbuot bilan muloqot qilishga ruxsat berishni so‘rab yo‘llagan arizasini rad etdi.
Avvalroq, Ulyukayevning shifokor huzuriga borishi ham tergovchining qarshiligiga sabab bo‘lgandi.

Tergov ma'lumotlariga ko‘ra, Aleksey Ulyukayev 2016 yilning 14 noyabr kuni Iqtisodiy rivojlanish vazirligi tomonidan “Rosneft” kompaniyasiga “Bashneft”ning 50 foiz miqdoridagi davlat aksiyalari paketini xarid qilish bo‘yicha kelishuviga ijobiy baho berilgani uchun 2 million dollar olgan.

Ulyukayev uy qamog‘ida 2017 yilning 15 yanvar kuniga qadar qoladi.