FIFA doping mojarosi doirasida Mutkoga qarshi tekshiruv boshladi

FIFA axloq qo‘mitasining tergov palatasi Rossiya futbol ittifoqi rahbari Vitaliy Mutkoga nisbatan surishtiruv ishlarini boshladi.

Daily Mail xabariga ko‘ra, Rossiyadagi doping bilan bog‘liq mojarolar haqidagi Richard Maklaren tomonidan tayyorlangan va yaqinda e'lon qilingan ma'ruzada Mutkoning nomi bir necha marotaba tilga olingan. Shu tufayli, FIFA davlat tomonidan doping iste'molini tashkil qilish va uni yashirish bo‘yicha yo‘lga qo‘yilgan tizimda Mutko qanday vazifani bajarganini aniqlab olishga qaror qilgan.

Agar uning aybi isbotlansa, Mutko futboldagi har qanday faoliyatdan chetlatiladi. Natijada, JCh-2018 musobaqasi Rossiyada o‘tishi huquqiy jihatdan qanchalik to‘g‘ri ekani haqidagi savol o‘rtaga chiqadi.

Hozircha FIFA mulozimlari bu borada har qanday rasmiy bayonotdan tiyilishmoqda.

«FIFA axloq qo‘mitasining tergov palatasi Maklaren ma'ruzasida aytilgan dalillarni inobatga oldi va uni yaxshilab o‘rganib chiqadi. Agar ahloq kodeksi buzilgani aniqlansa, tergov palatasi barcha zarur choralarni ko‘radi va bu haqda e'lon qiladi», degan vaziyat bilan tanish manba.

Taxmin qilinishicha, Maklaren jamoasida Mutkoning doping mojarosiga aloqadorligiga shohidlik beruvchilar bor.