Tramp AQShning Trans-Tinch okean hamkorligi kelishuvidan chiqishi haqidagi farmonni imzoladi

AQSh prezidenti Donald Tramp AQShning Trans-Tinch okean hamkorligi kelishuvidan chiqishi haqidagi farmonni imzoladi, deb xabar bermoqda Reuters axborot agentligi. 

AQSh boshchiligida bir necha yil davomida tayyorlangan bu kelishuv o‘tgan yil fevralida 12 davlat vakillari tomonidan imzolangandi va Osiyo-Tinch okeani mintaqasida kengroq erkin savdo hududini yaratishni nazarda tutgandi. 

Avvalgi prezident Barak Obama bu kelishuvni uning ishtirokchisi hisoblanmaydigan Xitoyga qarshi iqtisodiy kurashdagi asosiy choralardan biri sifatida qaragandi. Biroq AQSh kongressi hujjatni ratifikatsiya qilmagan va u kuchga kirmagan.

Tramp prezidentlik lavozimiga kirishishi bilanoq AQShning bu kelishuvdan chiqishiga erishishiga va'da bergandi. Shu bilan birga Tramp kelishuvga a'zo davlatlar bilan yakka tartibda savdo bo‘yicha muzokaralarni boshlashga choralar ko‘rmoqda.