Tanta va Iskandariyadagi teraktlarda halok bo‘lganlar oilasiga 5,5 ming funtdan to‘lab beriladi

Misr hukumati yakshanba kuni Tanta va Iskandariya shaharlarida amalga oshirilgan teraktlar oqibatida halok bo‘lganlar oilasiga 5,5 ming funtdan pul mablag‘larini to‘lab berish haqida ko‘rsatma berdi. Bu haqda mamlakat ijtimoiy birdamlik vaziri G‘ada Vali xabar berdi.

9 aprel kuni Misr shimolidagi Tanta va Iskandariya shaharlaridagi kopt nasroniylari qatnaydigan cherkovlarda xudkushlar tomonidan amalga oshirilgan ikkita terakt oqibatida 45 kishi halok bo‘ldi, 100dan ortiq inson jarohat oldi.

Misr hukumati dushanba kuni mamlakat prezidenti Abdul Fattoh as-Sisining davlatda uch oylik favqulodda holat kiritish haqidagi qarorini ma'qulladi. 

Misr qonunchiligiga ko‘ra, davlat rahbarining vazirlar mahkamasi tomonidan ma'qullangan qarori parlamentga yuborilishi kerak, u yerda esa yetti kun davomida bu qaror tasdiqlanishi lozim. Aks holda prezident qarori o‘z kuchini yo‘qotadi.