Ayn-Shams universiteti arxeologi Mamduh al-Damati boshchiligidagi tadqiqotchilar guruhi Podshohlar vodiysidagi Tutanxamonning KV62 maqbarasini oʻrganish natijalarini taqdim etdi.
17-sentabr kuni Amarna Royal Tombs Project seriyasida eʼlon qilingan hisobot 2023–2024-yillardagi dala oʻlchovlari va avvalgi tadqiqotlar qayta tahlilini birlashtiradi.
Mualliflar gap maqbara yaqinda ochilgani haqida emas, balki toʻplangan geofizik maʼlumotlarning yangi talqini toʻgʻrisida ketayotganini taʼkidlagan.
Izlanishlarga misrshunos Nikolas Rivz 2015-yilda ilgari surgan faraz asos boʻlgan. Uning taxminiga koʻra, Tutanxamonning nisbatan kichik maqbarasi kattaroq podshohlik dafn majmuasining tashqi qismida barpo etilgan, ichki xonalar esa devorlar bilan ajratilgan boʻlishi mumkin.
Rivz katta maqbaraning dastlabki egasi Nefertiti boʻlgan boʻlishi mumkinligini taxmin qilgan. Biroq avvalgi geofizik tekshiruvlar bir-biriga zid natijalar bergan.
Yangi tadqiqotda georadar va mikrogravimetriya usullaridan foydalanildi. Mikrogravimetriya tortishish kuchidagi juda kichik oʻzgarishlarni oʻlchab, yer ostidagi jinslar zichligini aniqlash imkonini beradi.
Mualliflar ayrim signallarni koʻmilgan yoʻlak va ehtimoliy yashirin xonalar belgisi sifatida talqin qilgan. Shu bilan birga, georadar dafn xonasi devorlaridan taxminan ikki metrgacha boʻlgan masofada aniq boʻshliqlarni koʻrsatmagan.
Tadqiqotchilar taqdim etgan uch oʻlchamli sxema topilgan xonalarning tayyor xaritasi emas, balki turli darajadagi ishonchga asoslangan modeldir.
Sxemada sariq rang bilan mavjudligi nisbatan ishonchli deb baholangan ikkita ehtimoliy xona, binafsha rangda esa ishonch darajasi pastroq boʻlgan qismlar koʻrsatilgan. Ularni bogʻlovchi yoʻlaklar mavjudligi ham hozircha faraz sifatida qolmoqda.
Ehtimoliy yashirin boʻshliqlarning oʻlchami va hajmi ularning qanday material bilan toʻlganiga oid taxminlarga bogʻliq.
Nature nashri suhbatlashgan mustaqil mutaxassislar natijalarni qiziqish bilan qabul qilgan, biroq yakuniy xulosa chiqarishga hali erta ekanini taʼkidlagan.
Tadqiqotchilar farazni kichik teshik burgʻilash va unga kamera kiritish orqali tekshirishni taklif qilmoqda. Buning uchun Misr rasmiylarining ruxsati talab etiladi.
