Ayn-Soxna Qizil dengiz sohilidagi eng yirik portlardan biri hisoblanadi va Suvaysh kanali iqtisodiy zonasi maʼmuriyati tasarrufida. Misr Transport vazirligi portni kompleks rekonstruksiya qilish va kengaytirish boʻyicha yirik milliy loyihani amalga oshirmoqda. Undan koʻzlangan asosiy maqsad Ayn-Soxnani Janubiy va Sharqiy Osiyo, Yevropa hamda Shimoliy Afrika oʻrtasidagi savdo oqimlariga xizmat koʻrsatadigan muhim dengiz-logistika markaziga aylantirishdir.
Loyiha doirasida jami toʻrtta port havzasi qurildi. Yangi prichallarning umumiy uzunligi 18 kilometrdan oshadi. Ular orasida 19 metr chuqurlikka ega boʻlgan va Ginnes rekordini oʻrnatgan sunʼiy port havzasi ham bor.
Shuningdek, portda yuklarni qabul qilish va saqlash uchun umumiy maydoni 9,2 million kvadrat metr boʻlgan maydonlar tashkil etildi. Port infratuzilmasi, muhandislik va kommunal tarmoqlari yangi obyektlarning ishlashini taʼminlash maqsadida modernizatsiya qilindi.
Transport infratuzilmasi ham kengaytirilgan. Xususan, port ichida 17 kilometrlik temir yoʻl tarmogʻi tashkil qilinib, u Ayn-Soxna - Yangi Al-Alameyn elektrlashtirilgan tezyurar temiryoʻl magistrali bilan bogʻlangan. Bu port orqali yuklarni dengizdan quruqlikka va aksincha tezroq yetkazib berish imkoniyatlarini oshiradi.
Planet kompaniyasi yaqinda Ayn-Soxna portidagi ulkan qurilish va rekonstruksiya ishlari qanday amalga oshirilganini aks ettiruvchi videoni ham taqdim etdi. Loyiha natijasida portning yuk qabul qilish va tashish imkoniyatlari sezilarli darajada kengayib, uning xalqaro dengiz logistikasidagi ahamiyati ortishi kutilmoqda.
Ginnes rekordi esa loyihada qoʻllanilgan muhandislik yechimlarining koʻlamini namoyon etadi. Ayn-Soxna portining modernizatsiya qilinishi Misrning mintaqaviy va xalqaro savdo aloqalarini mustahkamlash hamda mamlakatning yirik logistika markazi sifatidagi mavqeini kuchaytirishga xizmat qilishi taʼkidlangan.
